ថ្ងៃទី១២ សីហា ត្រូវបានសន្មត់ថាជាថ្មីដ៏រីករាយបំផុតមួយ សម្រាប់គូស្នេហ៍ជនជាតិចិន១គូ ប៉ុន្តែ អ្វីៗបានត្រឹមជាការខកបំណង ព្រោះតែកូនក្រមុំកើតជំងឺមហារីក បានលាចាកលោកប៉ុន្មានម៉ោងចុងក្រោយ មុនពេលពិធីមង្គលការរបស់ពួកគេត្រូវបានធ្វើឡើងនៅក្នុងមន្ទីរពេទ្យ ។
កូនកំលោះឈ្មោះ Yang Feng អាយុ ២៧ ឆ្នាំ ដែលបានសម្លៀកឈុតអាពាហ៍ពិពាហ៍យ៉ាងស្រស់សង្ហារ ស្ថិតនៅខាងក្រៅបន្ទប់មន្ទីរពេទ្យ ត្រូវបានធ្វើឲ្យខកចិត្តយ៉ាងខ្លាំង បន្ទាប់ពីទទួលបានព័ត៌មានថាគូដណ្តឹងរបស់គាត់ឈ្មោះ Xiao Hui អាយុ ៣២ ឆ្នាំ ដែលកើតរោគមហារីកឈាម បានស្លាប់មុនពេលពួកគេមានឱកាសអាចប្តូរពាក្យសច្ចាអាពាហ៍ពិពាហ៍ជាមួយគ្នា ។
យោងតាម China News គូស្នេហ៍នេះបានមានចំណងស្នេហ៍នឹងអស់រយៈពេល ២ ឆ្នាំ មកហើយ ។ Yang Feng ដែលអ្នកចែកចាយមុខទំនិញម្នាក់ កំពុងធ្វើដំណើរនាំយកទំនិញមួយចំនួន នៅពេលនោះ គាត់បានបើករថយន្តចូលទៅក្បែរ Xiao Hui ដែលមានបំណងសុំជិះដោយសារ ។ ពួកគេចាប់តាំងពីពេលនោះមក ក៏បានរក្សាការទំនាក់ទំនងគ្នា ហើយមិនយូរប៉ុន្មាន ពួកគេក៏បានត្រូវរូវគ្នា ។
Xiao Hui ត្រូវបានវិនិច្ឆ័យថាមានជំងឺមហារីកឈាម ដែលជាជំងឺមហារីកមួយប្រភេទប៉ះពាល់ដល់ឈាម និងខួរឆ្អឹង នៅពេលនាងមានអាយុ ២៤ ឆ្នាំ ។
ទោះបីដឹងថា នាងកើតជំងឺមហារីកឈាម Yang នៅតែបានប្តេជ្ញារក្សាចំណងស្នេហ៍មួយនេះយ៉ាងស្មោះស្ម័គ្រ ជាមួយនាង ។
គាត់បានចំណាយប្រាក់ប្រហែល ៣,០០០ យ័ន ទៅ ៤,០០០ យ័ន នៃប្រាក់ចំណូលប្រចាំខែរបស់គាត់ ៥,០០០ យ័ន សម្រាប់ការព្យាបាលរបស់នាង ។
នៅពេល Yang បានដឹងថា ជំងឺរបស់ Xiao Hui បានវិវត្តកាន់តែអាក្រក់ឡើង គាត់បានសម្រេចចិត្តរៀបចំអាពាហ៍ពិពាហ៍សម្រាប់នាង នៅឯមន្ទីរពេទ្យមួយ នៅក្នុងទីក្រុង Zhengzhou ខេត្ត Henan កាលពីថ្ងៃទីអាទិត្យ (១២ សីហា) ។
ក្រុមហ៊នអាពាហ៍ពិពាហ៍ក្នុងស្រុកមួយ បានជួយរៀបចំពិធីមង្គលការដ៏កំសត់នេះ នៅក្នុងមន្ទីរពេទ្យដោយឥតគិតថ្លៃ ។ ទោះបីមង្គលការត្រូវបានរៀបចំយ៉ាងប្រញាប់ប្រញាល់យ៉ាងនេះក្តី តែ Yang បានប្រាកដក្នុងចិត្តថា អ្វីៗនឹងស្រស់បំព្រងសម្រាប់រូបនាង ។
ជាអកុសល ស្ថានភាពរបស់ Xiao Hui បានធ្លាក់ចុះដុនដាបទៅៗយ៉ាងខ្លាំង ហើយទោះបីជាមានការព្យាយាមជាច្រើន ដើម្បីជួយសង្គ្រោះយ៉ាងណាក៏ដោយ ក៏នៅទីបំផុត នាងបានមជ្ជរាជនាំយកទៅទាល់តែបាន ។
Yang បានស្រក់ទឹកភ្នែក ខណៈនិយាយទៅកាន់អ្នកសារព័ត៌មានថា៖ «ពិតមែនហើយ ខ្ញុំទើបតែបានដឹងអំពីស្ថានភាពរបស់នាងកាលពីដើមឆ្នាំនេះ តែខ្ញុំបានខំប្រឹងអស់លទ្ធភាពហើយ» ៕ ឧត្តម (Worldofbuzz)