ស្វាយរៀង៖ លោក ជៀង អំ សមាជិកគណៈកម្មាធិការកណ្តាលគណបក្សប្រជាជនកម្ពុជានិងជាក្រុមការងារថ្នាក់ជាតិចុះជួយខេត្តស្វាយរៀងនៅព្រឹកថ្ងៃទី១៩ខែសីហាឆ្នាំ២០១៨នេះបានប្រាប់ដល់សមាជិកបក្សថាៈកុំឱ្យមានការរើសអើងចំពោះបងប្អូនដែលមិនបានទៅបោះឆ្នោតនាពេលកន្លងមកពីព្រោះយើងសុទ្ធតែជាប្រជាជនខ្មែរដូចគា្នទេធ្វើម៉េចបើគាត់ជ្រុលទៅហើយតែយើងក៏ត្រូវគិតពីរឿងបច្ចុប្បន្នទៅពេលអនាគតវិញហើយត្រូវមានការជឿជាក់ចំពោះការដឹកនាំរបស់សម្តេចតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជានាពេលបច្ចុប្បន្ន។
លោក ជៀង អំ បានមានប្រសាសន៍ដូច្នេះក្នុងឱកាសដែលលោកបានដឹកនាំក្រុមការងារចុះថ្លែងអំណរគុណដល់សមាជិកសមាជិកានៅភូមិត្រពាំងផ្អាវ ឃុំពងទឹក ស្រុករំដួលខេត្តស្វាយរៀងដែលបានបោះឆ្នោតជូនគណបក្សប្រជាជនកម្ពុជាកាលពីថ្ងៃទី២៩ខែកក្កដាឆ្នាំ២០១៨កន្លងទៅនេះ។
នាឱកាសនោះលោកបានប្រាប់ដល់សមាជិកបក្សបន្តទៀតថាគណបក្សប្រជាជនកម្ពុជាយើងទទួលបានជ័យជម្នះហើយ យុទ្ធនាការដេកផ្ទះឈ្នះឯង ម្រាមដៃស្អាតរបស់ក្រុមអតីតគណបក្សប្រឆាំងត្រូវបរាជ័យទាំងស្រុង។
លោក ជៀង អំ បានបញ្ជាក់ប្រាប់សមាជិកបក្សបន្តទៀតថាការបោះឆ្នោតជ្រើសតាំងតំណាងរាស្ត្រនីតិកាលទី៦នេះមានប្រជាពលរដ្ឋទៅបោះឆ្នោតជាង៨៣ភាគរយដូច្នេះការបោះឆ្នោតនេះបានបង្ហាញថាប្រជាពលរដ្ឋមិនបានជឿតាមការញុះញង់របស់ក្រុមអគតិមួយចំនួននោះឡើយគឺពួកម្នាក់ៗបានបំពេញកាតព្វកិច្ចជាពលរដ្ឋ ហើយបានបោះឆ្នោតជូនគណបក្សប្រជាជនឈ្នះភ្លូកទឹកភ្លូកដីតួយ៉ាងដូចជាខេត្តស្វាយរៀងគណបក្សយើងទទួលបាន៥អាសនៈលើ៥អាសនៈ។
លោកបានបន្តទៀតថាចាប់ពេលនេះតទៅនៅអាណត្តិទី៦រាជរដ្ឋាភិបាលនិងបន្តការងារអភិវឌ្ឍប្រទេសអោយមានភាពរីកចម្រើនគ្រប់វិស័យជាពិសេសផ្តោតសំខាន់ទៅលើវិស័យទឹក ភ្លើង ផ្លូវ ធនធានមនុស្ស មួយវិញទៀតបង្កើនការវិនិយោគបន្ថែមទៀតដើម្បីស្រូបយកកម្មករកម្មការនីមានការងារធ្វើកាន់តែច្រើនឡើងក្នុងការកាត់បន្ថយភាពក្រីក្រជូនប្រជាពលរដ្ឋ។
នៅក្នុងឱកាសនោះលោក ជៀង អំ ក៏បានថ្លែងអំណរគុណដល់សមាជិកសមាជិកានិងប្រជាពលរដ្ឋទាំងអស់នៅឃុំ ពងទឹក ជាពិសេសបងប្អូនប្រជាពលរដ្ឋក្នុងភូមិត្រពាំងផ្អាវដែលបានបោះឆ្នោតគាំទ្រគណបក្សប្រជាជនកម្ពុជាឈ្នះយ៉ាងច្រើនភ្លូកទឹកភ្លូកដីហើយក៏សូមអោយសមាជិកសមាជិកាបន្តគាំទ្រគណបក្សប្រជាជនកម្ពុជាគ្រប់អាណត្តិបន្តទៀតជាពិសេសគាំទ្រសម្តេចតេជោហ៊ុនធ្វើជានាយករដ្ឋមន្ត្រី។លោក ជៀង អំ និងក្រុមការងារបានពិសារបាយសាមគ្គីដល់សមាជិកបក្សផងដែរ។ វ៉ៃកូ