ប្រភពពី Kyodoជប៉ុន ដែលដកស្រង់ប្រភពពីបណ្ដាមន្ដ្រីនៃអង្គការអាកាសចរណ៍ស៊ីវិលអន្ដរជាតិ (ICAO) ឱ្យដឹងថា អគ្គនាយកដ្ឋានអាកាសចរណ៍ស៊ីវិលកូរ៉េខាងជើងបានឯកភាពអនុញ្ញាតឱ្យបណ្ដាមន្ដ្រីអន្តរជាតិធ្វើការត្រួតពិនិត្យនៅនឹងកន្លែង ចំពោះសុវត្ថិភាពនៃការហោះហើរអន្ដរជាតិនៅប្រទេសនេះ។
បច្ចុប្បន្ន ICAOក៏កំពុងបង្កើតឱ្យមានការចាត់មន្ដ្រីទៅកាន់កូរ៉េខាងជើងក្នុងឆ្នាំនេះដើម្បីពិនិត្យនិងបញ្ជាក់អំពីបណ្ដាវិធានការ ដែលក្រុងព្យុងយ៉ាងបានអនុវត្ដន៍ស្របតាមកិច្ចសន្យា សំដៅត្រួតពិនិត្យមើលបណ្ដាករណីបាញ់បង្ហោះកាំជ្រួចដែលពុំបាន ប្រកាសជាសាធារណៈ។
គូររំលឹកថា ក្រោយដំណើរទស្សនកិច្ចកាលពីខែឧសភា ICAOបានឱ្យដឹងថា កូរ៉េខាងជើងបានសន្យាប្រកាសផ្អាកសកម្មភាពដែលបង្កគ្រោះថ្នាក់អាកាសចរណ៍ស៊ីវិល ដូចជាការបាញ់បង្ហោះសាកល្បងកាំជ្រួចរយៈចម្ងាយឆ្ងាយដែលមិនប្រកាសឱ្យដឹងជាមុន។
ទង្វើរបស់កូរ៉េខាងជើងដែលអនុញ្ញាតឱ្យមានប្រតិបត្ដិការត្រួតពិនិត្យនៅនឹងកន្លែង ត្រូវបានចាត់ទុកថាជាកិច្ចប្រឹងប្រែងមួយរបស់ក្រុងព្យុងយ៉ាងសំដៅបង្កជំនឿទុកចិត្តដែលបានសន្យាក្នុងការផ្អាកសាកល្បងកាំជ្រួចជាមួយសហគមន៍អន្ដរជាតិ។
គួររំលឹកថា កាលពីឆ្នាំទៅមិញ កូរ៉េខាងជើងបានដំណើរការសាកល្បងកាំជ្រួចដោយពុំប្រកាសឱ្យដឹងជាមុន ខណៈពេលដែលប្រទេសនេះក៏ជាសមាជិករបស់ ICAOផងដែរនោះ៕
សូយន
