ភ្នំពេញ ៖ នៅថ្ងៃអាទិត្យ ថ្ងៃទី១៩ ខែសីហា ឆ្នាំ២០១៨ វេលាម៉ោង ១៤និង៣០នាទី ការិយាល័យស៊ើបអង្កេតនិងអនុវត្តនីតិវិធី បានទទួលជនបរទេសម្នាក់ពីកម្លាំងនគរបាលរដ្ឋបាលប៉ុស្តិ៍ក្រាំងធ្នង់ ខណ្ឌសែនសុខ ករណីជននេះ បង្កជំលោះនៅតាមទីសាធារណៈ(វាយតប់) ធ្វើអោយខូចសណ្ដាប់ធ្នាប់ និងរំខានដល់ប្រជាពលរដ្ឋ។
លោកវរសេនីយ៍ទោ ជា ចិត្រា នាយការិយាល័យស៊ើបអង្កេត និងអនុវត្តនីតិវិធី បានឲ្យដឹងថា ជនបរទេសខាងលើឈ្មោះ IROEGBU VCHE ANDREW ភេទប្រុស អាយុ៤៦ឆ្នាំ ជនជាតិនីហ្សេរីយ៉ា។ បន្ទាប់មកកម្លាំងការិយាល័យស៊ើបអង្កេត និងអនុវត្តនីតិវិធី បានធ្វើការសាកសួរ ឃើញថាជននេះគ្មានលិខិតឆ្លងដែន និងគ្មានមុខរបរពិតប្រាកដ។ ត្រូវបានឃាត់ខ្លួន បញ្ជូនទៅអគ្គនាយកដ្ឋានអន្តោប្រវេសន៍ដើម្បីអនុវត្តនីតិវិធីបន្តនៃច្បាប់ ៕ ដោយ ៖ បញ្ញាស័ក្តិ