កំពង់ចាម ៖ នគរបាលស្រុកព្រៃឈរ ចុះបង្ក្រាបទីតាំង លួចលេងល្បែងស៊ីសងខុសច្បាប់ (ជល់មាន់ដាក់លុយ) នៅចំណុចវាលស្រែ ស្ថិតនៅភូមិដៃបួន ឃុំជ្រៃវៀន ស្រុកព្រៃឈរ ខេត្តកំពង់ចាម នៅថ្ងៃទី១៩ ខែសីហា ឆ្នាំ២០១៨ វេលាម៉ោង១៣ និង៣០នាទី ។ ក្រោយពីទទួលបានព័ត៌មានពីប្រជាពលរដ្ឋភ្លាម លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានបញ្ជាដល់ កម្លាំងរបស់ផែនការងារនគរបាលព្រហ្មទណ្ឌដឹកនាំដោយលោកវរសេនីយ៍ឯក ថាញ់ សុខវុន នាយការិយាល័យនគរបាលព្រហ្មទណ្ឌកម្រិតស្រាល សហការជាមួយ កម្លាំងរបស់អធិការដ្ឋាននគរបាលស្រុកព្រៃឈរ ។
លោកវរសេនីយ៍ឯក ថាញ់ សុខវុន នាយការិយាល័យនគរបាលព្រហ្មទណ្ឌកម្រិតស្រាលបានឲ្យដឹងថាក្នុងប្រតិបត្តិការខាងលើកម្លាំងជំនាញបានឃាត់ខ្លួនជនសង្ស័យ៣នាក់រួមមានៈទី១-ឈ្មោះ ខុប ហឿន ភេទប្រុស អាយុ៦២ឆ្នាំ ជនជាតិខ្មែរ ទី២-ឈ្មោះ ស្រី ប៊ុនធឿន ភេទប្រុស អាយុ២៩ឆ្នាំ ជនជាតិខ្មែរ ជនទាំង០២នាក់ខាងលើ មានទីលំនៅភូមិទួលតាកោ ឃុំជ្រៃវៀន ស្រុកព្រៃឈរ ខេត្តកំពង់ចាម និងទី៣-ឈ្មោះ ស៊ុយ សិដ្ឋ ភេទប្រុស អាយុ១៩ឆ្នាំ នៅភូមិអណ្តូងតាអុង ឃុំព្រែកក្របៅ ស្រុកកងមាស ខេត្តកំពង់ចាម។
ដកហូតវត្ថុតាងរួមមាន៖ មាន់ជល់ចំនួន២ក្បាល(ងាប់) ជញ្ជីងថ្លឹងមាន់ចំនួន១ ម៉ូតូចំនួន៧គ្រឿង ប្រាក់ចំនួន៩០០០០រៀល ស្កុតរំមាន់៥ដុំ កន្ក្រក់ដាក់មាន់០១។
បច្ចុប្បន្នជនសង្ស័យ និងវត្ថុតាងខាងលើ នាំមកកាន់ស្នងការដ្ឋាននគរបាលខេត្តកំពង់ចាម ដើម្បីសាកសួរនិងចងក្រងសំណុំរឿងតាមនីតិវិធី៕ ដោយ ៖ បញ្ញាស័ក្តិ
