កំពង់ស្ពឺ ៖ តួនាទីរបស់មន្ត្រីឧទ្យានុរក្សសំខាន់ គឺត្រូវចូលរួមសម្របសម្រួលការងារអភិវឌ្ឍន៍សហគមន៍មូលដ្ឋាន និងជាពិសេសអន្តរាគមន៍លើបទល្មើសផ្សេងៗនៅក្នុងតំបន់សហគន៍ ក៏ដូចជាផែនការក្នុងការរៀបចំឧទ្យានជាតិឱ្យស្របទៅនឹងយុទ្ធសាស្ត្រនៃការគ្រប់គ្រងតំបន់ការពារធម្មជាតិ។
សូមបញ្ជាក់ថា នៅថ្ងៃទី១៨ ខែសីហា ឆ្នាំ២០១៨ លោកសូ ខនឬទ្ធីគុណ អនុរដ្ឋលេខាធិការក្រសួងបរិស្ថាន ដោយមានការអមដំណើរ ដោយលោក ខៀវ បូរិន អគ្គនាយក នៃអគ្គនាយកដ្ឋានសហគមន៍មូលដ្ឋាន និងមានការចូលរួមលោកអគ្គនាយករង ប្រធាន និងអនុប្រធាននាយកដ្ឋាន ប្រធានមន្ទីរបរិស្ថានខេត្តកំពង់ស្ពឺ បានចុះប្រជុំពិភាក្សាលើការគ្រប់គ្រងឧទ្យានជាតិគិរីរម្យ និងពង្រឹងការអនុវត្តច្បាប់របស់មន្ត្រីឧទ្យានុរក្ស ដែលមានការចូលរួមពីមន្ត្រីឧទ្យានុរក្សនៃឧទ្យានជាតិគិរីរម្យប្រមាណ៣០នាក់។
លោក ជា ទិត អនុប្រធានមន្ទីរបរិស្ថានខេត្តកំពង់ស្ពឺ បានរាយការណ៍ជូនគណៈអធិបតី និងអ្នកចូលរួម អំពីស្ថានភាពទូទៅនៃការគ្រប់គ្រងឧទ្យានជាតិ ឱកាស និងការលំបាករបស់មន្ត្រីឧទ្យានុរក្ស ក៏ដូចជាផែនការក្នុងការរៀបចំឧទ្យានជាតិឱ្យស្របទៅនឹងយុទ្ធសាស្ត្រនៃការគ្រប់គ្រងតំបនការពារធម្មជាតិ។
នៅក្នុងពិធីនោះ លោកម សូ ខនឬទ្ធីគុណ បានក្រើនរំលឹកពីតួនាទីភារៈកិច្ចរបស់មន្ត្រីឧទ្យានុរក្ស គឺត្រូវមានភាពជាម្ចាស់លើការគ្រប់គ្រងឧទ្យានជាតិ និងពង្រឹងកិច្ចសហការជាមួយអាជ្ញាធរមូលដ្ឋាន ដៃគូអភិវឌ្ឍន៍ ព្រមទាំងចូលរួមការងារសហគមន៍មូលដ្ឋាន។ លោក បន្តថា ដើម្បីបំពេញការងារខាងលើបាន មន្ត្រីឧទ្យានុរក្សត្រូវរៀនសូត្រជាប្រចាំ កសាងសមត្ថភាពខ្លួនឯង និងកសាងសមត្ថភាពក្រុម មានសីលធម៌រស់នៅល្អ និងជាពិសេសមានឆន្ទ:មុតមាំក្នុងការបំពេញការងារ។
ជាចុងក្រោយឯកឧត្តម បានបញ្ជាក់បន្ថែមថា ថ្នាក់ដឹកនាំក្រសួងបរិស្ថាន បានយកចិត្តទុកដាក់ខ្ពស់ចំពោះសុខទុក្ខ និងជីវភាពរស់នៅរបស់មន្ត្រីឧទ្យានុរក្ស។
ទន្ទឹមនោះដែរ លោកខៀវ បូរិន បានមានប្រសាសន៍ថា តួនាទីរបស់មន្ត្រីឧទ្យានុរក្សសំខាន់មួយទៀត គឺត្រូវចូលរួមសម្របសម្រួលការងារអភិវឌ្ឍន៍សហគមន៍មូលដ្ឋាន និងជាពិសេសអន្តរាគមន៍លើបទល្មើសផ្សេងៗនៅក្នុងតំបន់សហគន៍។
លោក បានស្នើឱ្យមន្ទីរបរិស្ថាន សហការជាមួយអាជ្ញាធរមូលដ្ឋាន ធ្វើបច្ចុប្បន្នភាពអំពីប្រជាជនដែលមករស់នៅ និងលក់ដូរលើឧទ្យានគិរីរម្យ ដើម្បីកំណត់អត្តសញ្ញាណឱ្យបានច្បាស់លាស់ ជៀសវាងធ្វើឱ្យប៉ះពាល់ដល់ការគ្រប់គ្រង និងតម្លៃនៃឧទ្យានជាតិ។
ឆ្លើយតបតាមអនុសាសន៍ របស់លោកអនុរដ្ឋលេខាធិការ និងលោកអគ្គនាយក លោក ជូ ចន្ទតារាឬទ្ធិ ប្រធានការិយាល័យឧទ្យានជាតិ នឹងពង្រឹងការគ្រប់គ្រងមន្ត្រីឧទ្យានុរក្សបន្ថែមទៀត និងពង្រឹងកិច្ចសាមគ្គីភាពផ្ទៃក្នុង ព្រមទាំងសហការជាមួយស្ថាប័នពាក់ព័ន្ធ ដើម្បីរៀបចំការរស់នៅ និងលក់ដូររបស់ប្រជាជនលើឧទ្យានជាតិឱ្យមានសណ្តាប់ធ្នាប់ល្អ៕ ដោយ ៖ បញ្ញាស័ក្តិ