ភ្នំពេញ៖ នាព្រឹកថ្ងៃចន្ទ ថ្ងៃទី២០ ខែសីហា ឆ្នាំ២០១៨នេះ លោកឃួង ស្រេង អភិបាល នៃគណៈអភិបាលរាជធានីភ្នំពេញ បានអញ្ជើញជាអធិបតីក្នុងអង្គប្រជុំគណៈកម្មាធិការត្រួតពិនិត្យគ្រឿងញៀនរាជធានីភ្នំពេញ ដោយមានការចូលរួមអភិបាលខណ្ឌទាំង១២ មន្ទីរជំនាញ និងអាជ្ញាធរ អង្គភាពពាក់ព័ន្ធទាំងអស់ក្នុងរាជធានីភ្នំពេញ។
លោកប្រធាននៃអង្គប្រជុំបានផ្ដាំផ្ញើដល់អភិបាលខណ្ឌទាំង១២ អាជ្ញាធរ អង្គភាពពាក់ព័ន្ធទាំងអស់ត្រូវអនុវត្តតាមវិធានការប្រយុទ្ធ បង្ការ បង្ក្រាប និងទប់ស្ដាត់បញ្ហាគ្រឿងញៀន ឲ្យប្រសិទ្ធភាពខ្ពស់ និងទទួលយកបាន ពីសំណាក់បងប្អូនប្រជាពលរដ្ឋក្នុងរាជធានីភ្នំពេញ។
ប្រធានគណៈបញ្ជាការឯកភាព រាជធានីភ្នំពេញ និងជាប្រធានគណៈកម្មាធិការ ត្រួតពិនិត្យគ្រឿងញៀន រាជធានីភ្នំពេញ លោកឃួង ស្រេង បានធ្វើការណែនាំឱ្យអាជ្ញាធរ និង មន្ត្រីពាក់ព័ន្ធទាំងអស់ បន្តរឹតបណ្តឹងការចុះល្បាត និងបង្ក្រាបនូវរាល់បទល្មើស ជាពិសេស ពាក់ព័ន្ធនឹងបទល្មើសគ្រឿងញៀន ដើម្បីផ្តល់នូវសុខ សុវត្ថិភាព ដល់ប្រជាពលរដ្ឋ និង វាសនា អនាគត របស់កូនចៅយើងទាំងអស់គ្នា។
លោកអភិបាល បានថ្លែងថា គ្រឿងញៀនពិតជាបានធ្វើឱ្យប៉ះពាល់ដល់ធនធាន ដ៏មានសក្តានុពលរបស់ប្រទេសជាតិ ដូច្នេះត្រូវរួមគ្នា ការពារ ទប់ស្កាត់ ឱ្យបានខ្លាំងក្លាបំផុត នូវការប្រើប្រាស់ ការជួញដូរ ការធ្វើចរាចរគ្រឿងញៀន នៅក្នុងរាជធានីភ្នំពេញឲ្យបាន។
លោកឃួង ស្រេង បានបន្តទៀតថា កន្លងមកនេះ មានអាជ្ញាធរមូលដ្ឋាន និងអ្នកពាក់ព័ន្ធមួយចំនួន ហាក់មានការ ព្រងើយកន្តើយ ចំពោះការបង្ក្រាប ការផ្សព្វផ្សាយ អប់រំ អំពីផលប៉ះពាល់នៃគ្រឿងញៀន ទៅដល់មហាជន យុវជន ធ្វើឱ្យការប្រើប្រាស់គ្រឿងញៀន ត្រូវបានគេមើលឃើញថា មានករណីកើតឡើងជាច្រើន ជាពិសេសនៅពេលថ្មីៗនេះ មានការណីចរាចរគ្រឿងញៀនដ៏ធំមួយ ដែលត្រូវ កម្លាំងមានសមត្ថកិច្ច សហការគ្នាអន្តរាគមន៍ និងចាប់បាននៅក្នុងរាជធានីភ្នំពេញ។
គណៈបញ្ជាការ ឯកភាពរាជធានីភ្នំពេញ បានកោះប្រជុំ ដល់កងកម្លាំង និងសមត្ថកិច្ច ពាក់ព័ន្ធទាំងអស់ ក្នុងរាជធានីភ្នំពេញ ត្រូវបង្កើនការប្រុងប្រយ័ត្ន បង្កើនការរឹតបណ្តឹង ទាំងការទប់ស្កាត់ ការអប់រំ និងផ្សព្វផ្សាយឱ្យបានទូលំទូលាយបន្ថែមទៀត ដើម្បីអនុវត្តគោលនយោបាយ ភូមិ ឃុំ មានសុវត្ថិភាព នឹងបង្កើនភាពកក់ក្តៅជូនប្រជាពលរដ្ឋ តាមអនុសាសន៍ ណែនាំរបស់ប្រមុខរាជរដ្ឋាភិបាល គឺ បម្រើរាស្ត្រដោយស្មោះត្រង់បំផុត និងកាន់តែទ្វេឡើងថែមទៀត។
លោកឃួង ស្រេង បានបញ្ជាក់ថា “បញ្ហាគ្រឿងញៀន ផលប៉ះពាល់របស់វា មិនមែនចំពោះមនុស្សចាស់ ឬក្មេងទេ គឺវាអាចកើតមានទាំងអស់ បើយើងមិនបានយកចិត្តទុកដាក់នោះ ។ប៉ុន្តែអ្វីដែលយើង ត្រូវបានយកចិត្តទុកដាក់ខ្ពស់ គឺស្រទាប់យុវជន ដោយសារតែ យុវជនកម្លាំងស្នូល ជាទំពាំងស្នងឫស្សី ជាធនធានដ៏មានតម្លៃ ក្នុងការចូលរួមអភិវឌ្ឍន៍ ប្រទេសជាតិ”។
លោកអភិបាលរាជធានីភ្នំពេញ បានលើកឡើងទៀតថា ការទប់ស្កាត់គ្រឿងញៀន ទទួលជោគជ័យទៅបាន គឺ មិនមែនជាបន្ទុករបស់ស្ថាប័នណាមួយ ឬ បុគ្គលណាម្នាក់នោះទេ គឺជាការចូលរួមចំណែក ពីគ្រប់ភាគីពាក់ព័ន្ធ ជាពិសេស ឪពុក ម្តាយ អាណាព្យាបាល លោកគ្រូ អ្នកគ្រូ ព្រះសង្ឃ និងប្រជាពលរដ្ឋទាំងអស់ ដើម្បីជោគវាសនា អនាគត កូនចៅ យើងទាំងអស់គ្នា៕ ដោយ៖កូឡាប