ខេត្តព្រះសីហនុ៖ សមត្ថកិច្ចនគរបាលស្រុកព្រៃនប់ បានឲ្យដឹងថា ស្ត្រីវ័យ ២៣ឆ្នាំម្នាក់ ត្រូវបានគេប្រទះឃើញក្នុងទឹកប្រឡាយ និងថែមទាំងមានឈ្លើងទាមផង នៅក្បែរសួនច្បារវាលរេញ កាលពីម៉ោងជាង ៩យប់ថ្ងៃទី១៩ ខែសីហា ឆ្នាំ២០១៨។
ស្ត្រីរូបនោះត្រូវបានគេជួយនាំយកទៅកាន់ប៉ុស្តិ៍នគរបាលស្រុកព្រៃនប់ ដើម្បីសាកសួរពីដើមរឿងផ្សេងៗ។ សមត្ថកិច្ចនគរបាលបន្តថា ជាមួយអាការៈរងារញ័រញាក់ និងរវើរវាយផងនោះ គឺនៅជាប់ខ្លួនស្ត្រីខាងលើនេះ ឃើញមានអត្តសញ្ញាណ ប័ណ្ណ១សន្លឹក លុយខ្មែរ និងលុយដុល្លារសរុបជាង៥០មុឺនរៀល រួមទាំងសំបុត្ររថយន្តក្រុង២សន្លឹក(ពីបាត់ដំបង-ភ្នំពេញ និងពីភ្នំពេញ ខេត្តព្រះសីហនុ)។ក្រោយបញ្ចប់ការសាកសួរ សមត្ថកិច្ចនគរបាលស្រុកព្រៃនប់ មិនបានបង្ហើបប្រាប់ពីអត្តសញ្ញាណ របស់ស្ត្រីខាងលើនេះទេ។
យ៉ាងនេះក្តី តាមរយៈអត្តសញ្ញាណបណ្ណ័នៅជាប់ខ្លួនស្ត្រីរូបនោះ គឺ នៅព្រឹកថ្ងៃច័ន្ទ ទី២០ ខែសីហា ឆ្នាំ២០១៨នេះ សមត្ថកិច្ចនគរបាល ស្រុកព្រៃនប់ បានទំនាក់ទំនងទៅគ្រួសារស្ត្រីរូបនេះ ដើម្បីឲ្យខាងក្រុមគ្រួសារមកទទួលយកទៅផ្ទះវិញ៕ ដែន សីមា
