តាមSputniknewsចុះផ្សាយព័ត៌មានថ្ងៃទី២០សីហា ឱ្យដឹងថា អ្នកនាំពាក្យវិមានក្រឹមឡាំង លោកDmitry Peskov បានបញ្ជាក់ថា ប្រធានាធិបតីរុស្ស៊ីVladimir Putin មានបំណងប្រាថ្នាចង់អូសទាញទំនាក់ទំនងជាមួយអាមេរិកឱ្យចាកផុតពីវិបត្តិយ៉ាងធ្ងន់ធ្ងរ។
ថ្លែងទៅកាន់អ្នកសារព័ត៌មាន វិមានក្រឹមឡាំងចាត់ទុកផែនការដាក់ទណ្ឌកម្មថ្មីរបស់អាមេរិកសំដៅមកលើរុស្ស៊ីគឺជាទង្វើមិនស្របច្បាប់ ខ្វះភាពស្និទ្ធស្នាល ហើយនិងជះឥទ្ធិពលដល់ពាណិជ្ជកម្មពិភពលោក។
លោកឱ្យដឹងបន្ថែមថា ទំនាក់ទំនងទ្វេភាគី រួមនឹងបញ្ហាអន្ដរជាតិមួយចំនួននឹងក្លាយជាចំណុចស្នូលក្នុងកិច្ចពិភាក្សាខាង មុខនេះរវាងទីប្រឹក្សាសន្ដិសុខជាតិអាមេរិក John Bolton និងលេខាក្រុមប្រឹក្សាសន្ដិសុខជាតិរុស្ស៊ីNikolai Patrushev ។
ទោះយ៉ាងណា ខ្លឹមសារនៃកម្មវិធីប្រជុំជាក់ស្ដែងនៅពុំទាន់បានកំណត់ជាក់លាក់ទេ៕
សូយន
