ភ្នំពេញ ៖ ព្រះមហាក្សត្រ ចេញព្រះរាជក្រឹត្យត្រាស់បង្គាប់ឲ្យលើកលែងទោសដល់មេសកម្មជនដីធ្លីបឹងកក់អ្នកស្រី ទេព វន្នី និងបក្ខពួកចំនួន៣នាក់ទៀត តាមសំណើសម្តេចតេជោ ហ៊ុន សែន នាយករដ្ឋមន្ត្រីកម្ពុជា។
បើយោងតាមព្រះរាជក្រឹត្យយប់ថ្ងៃទី២០ ខែសីហា ឆ្នាំ២០១៨នេះ បានត្រាស់បង្គាប់ លើកលែងទោសឲ្យទណ្ឌិតចំនួន៤រូប ៖ ១)ទណ្ឌិតឈ្មោះ ទេព វន្នី ភេទស្រី ដែលត្រូវតុលាការសម្រេចផ្តន្ទាទោសដាក់ពន្ធនាគារ ពីបទប្រមាថអ្នករាជការសាធារណៈ និងបទប្រឆាំងអ្នករាជការសាធារណៈ ដោយមានស្ថានទម្ងន់ទោស តាមអំណាចសាលដីកា លេខ៣៩៤ចុះថ្ងៃទី៨ ខែធ្នូឆ្នាំ២០១៧ របស់តុលាការកំពូល និងបទហិង្សាដោយចេតនាមានស្ថានទម្ងន់ទោស តាមអំណាចសាលដីកា លេខ៥១ ចុះថ្ងៃទី៧ ខែកុម្ភៈ ឆ្នាំ២០១៨ របស់តុលាការកំពូល។ ២) ទណ្ឌិតឈ្មោះ ហេង មុំ ភេទស្រី ដែលត្រូវបានតុលាការសម្រេចផ្តន្ទាទោស ដាក់ពន្ធនាគារ ពីបទប្រមាថអ្នករាជការសាធារណៈ និងបទប្រឆាំងអ្នករាជការសាធារណៈដោយមាន ស្ថានទម្ងន់ទោស តាមអំណាចសាលដីកាលេខ ៣៩៤ ចុះថ្ងៃទី៨ ខែធ្នូ ឆ្នាំ២០១៧ របស់តុលាការកំពូល។ ៣) ទណ្ឌិតឈ្មោះ បូ ឆវី ភេទស្រី ដែលត្រូវបានតុលាការសម្រេចផ្តន្ទាទោស ដាក់ពន្ធនាគារ ពីបទប្រមាថអ្នករាជការសាធារណៈ និងបទប្រឆាំងអ្នករាជការសាធារណៈ ដោយមានស្ថានទម្ងន់ទោស តាមអំណាចសាលដីកាលេខ ៣៩៤ ចុះថ្ងៃទី៨ខែធ្នូឆ្នាំ២០១៨ របស់តុលាការកំពូល និង៤) ទណ្ឌិតឈ្មោះ គង់ ចន្ថា ភេទស្រី ដែលត្រូវតុលាការសម្រេចផ្ទន្ទាទោសដាក់ពន្ធនាគារ ពីបទប្រមាថអ្នករាជការសាធារណៈ និងបទប្រឆាំងអ្នករាជការសាធារណៈ ដោយមានស្ថានទម្ងន់ទោស តាមអំណាចសាលដីកាលេខ ៣៩៤ ចុះថ្ងៃទី៨ខែធ្នូឆ្នាំ២០១៧ របស់តុលាការកំពូល។
ព្រះមហាក្សត្រ ព្រះបាទ សម្តេចព្រះនរោត្តមសីហមុនី បានត្រាស់បង្គាប់ដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ត្រូវទទួលបន្ទុកអនុវត្តព្រះរាជក្រឹត្យនេះ ចាប់ពីថ្ងៃឡាយព្រះហស្តលេខាតទៅ។
នៅយប់ថ្ងៃទី២០ ខែសីហា ឆ្នាំ២០១៨នេះ លោកគុជ គឹមឡុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចេញដីកាដោះលែងសកម្មជនដីធ្លី សហគមន៍បឹងកក់ម្នាក់ គឺអ្នកស្រី ទេព វន្នី ចេញពីពន្ធនាគារហើយ ក្រោយជាប់ពន្ធនាគារព្រៃសជាង២ឆ្នាំ។
លោកគុជ គឹមឡុង ក៏បានសម្រេច បង្គាប់មកលោកប្រធានមណ្ឌលអប់រំកែប្រែទី២ (ម២) ឲ្យដោះលែងឈ្មោះទេព វន្នី ភេទស្រី ឆ្នាំកំណើត ១៩៨១ ជាបន្ទាន់ ប្រសិនបើឈ្មោះនេះពុំត្រូវបានឃុំខ្លួន ពីបទល្មើសផ្សេង៕ ដោយ ៖ កូឡាប