នេះជាវីដេអូដ៏រន្ធត់បំផុតមួយ ដែលបង្ហាញឲ្យឃើញបុរសវ័យក្មេងម្នាក់ ប្រដាប់ដោយកាំភ្លើងខ្លី១ដើម ចូលប្លន់ក្នុងហាងលក់ដូរទំនិញទំនើប១កន្លែង នៅក្នុងទីក្រុង Monterrey ប្រទេសម៉ិចស៊ិកូ ។
តាមរយៈវីដេអូកាមេរ៉ាហាង បុរសវ័យក្មេងម្នាក់ស្លៀកខោខូវប៊យជើងខ្លីត្រឹមជង្គង់ និងពាក់អាវយឺតម៉ូតគ្របក្បាល បានដើរចូលក្នុងហាង និងដកកាំភ្លើងភ្ជង់អ្នកគិតលុយភ្លាមៗ ។ បុរសនេះបន្ទាប់មក បានភ្ជង់ទៅលើបុរសជាអតិថិជនវ័យចំណាស់ម្នាក់ពាក់មួកអ្នកឃ្វាលគោ ដោយបានបញ្ជាឲ្យគាត់ដកលុយពីក្នុងហោប៉ៅ ។ ប៉ុន្តែ ខណៈចោរប្លន់ជើងថ្មីរូបនេះក្រឡេកឃើញស្ត្រីវ័យក្មេងម្នាក់ដើរចូលមក ក៏បានងាកទៅភ្ជង់នាងជាបន្ត ដែលជាឱកាសល្អសម្រាប់បុរសវ័យចំណាស់ដែលមានភាពរហ័សរហួនដ៏ក្លាហាន ស្ទុះទៅចាប់ឱបវាពីក្រោយជាប់ និងបណ្តាលឲ្យវាត្រូវរបូតកាំភ្លើងពីដៃធ្លាក់លើកម្រាល ។
ភ្លាមៗនោះ បុរសជាបុគ្គលិកហាងម្នាក់ក៏បានស្ទុះចូលមក និងរើសកាំភ្លើង ខណៈបុរសវ័យចំណាស់ (អ្នកឃ្វាលគោ) និងចោរនៅតែប្រឈមមុខដាក់គ្នា ។ ប៉ុន្មានវិនាទីក្រោយមក ចោរនោះបានប្រាស់ខ្លួនរួចផុតពីដៃបុរសវ័យចំណាស់ និងព្យាយាមរត់គេចចេញពីហាង ប៉ុន្តែ វាត្រូវបានបុរសរើសបុគ្គលិករើសកាំភ្លើងចាប់ក្របួចជាប់តែម្តង… ។
ចុងបញ្ចប់នៃវីដេអូ ស្ត្រីជាអ្នកគិតលុយដែលជាជនរងគ្រោះមុនគេ ត្រូវបានឃើញចាប់ទាញទូរស័ព្ទខ្សែនៅជាប់ជញ្ជាំង ខលទៅប៉ូលីសមកជួយអន្តរាគមន៍ ៕ ឧត្តម
