ស្វាយរៀង ៖ រថយន្តកុងទឺន័រមួយគ្រឿងបាន រេចង្កូតបុកបង្កាន់ដៃស្ពាន និងម៉ូតូក្មេងស្ទូចត្រីបានធ្លាក់ចូលទឹកទន្លេវ៉ៃគោ តែសំណាងល្អហើយគ្មានបង្កគ្រោះថ្នាក់ដល់អ្នកធ្វើដំណើរណាម្នាក់នោះទេ ។
ករណីនេះ បានកើតឡើងកាលវេលាម៉ោង៤និង២៥នាទីរសៀល ថ្ងៃទី២០ ខែសីហា ឆ្នាំ២០១៨ នៅលើផ្លូវជាតិលេខ១ ត្រង់ចំណុចក្បាលស្ពានហាយវ៉េ ប៉ែកខាងកើត ស្ថិតក្នុងភូមិ បាក់រនាស់ សង្កាត់សង្ឃ័រ ក្រុងស្វាយរៀង ខេត្តស្វាយរៀង ។
បើតាមក្មេងប្រុសជាម្ចាស់ម៉ូតូមានឈ្មោះ សំ មន្ថារចនា អាយុ ១៥ឆ្នាំ មានទីលំនៅភូមិ វាលយន្ត សង្កាត់/ក្រុង ខេត្តស្វាយរៀង បានឲ្យក្រុមអ្នកសារព័ត៌មានដឹងថា ៖ រូបគេ និងមិត្តភក្តិបានមកស្ទូចត្រីនៅក្រោមស្ពានហាយវ៉េ ចំណែកម៉ូតូបញ្ឈរទុកអែបចិញ្ចើមថ្នល់ ស្រាប់តែមានរថយន្តកុងតឺន័រមួយគ្រឿង បើកបរយ៉ាងលឿនពីទិសខាងកើតមកលិច មកដល់ចំណុចខាងលើ ស្រាប់តែរថយន្តបានរេចង្កូតមកខាងឆ្វេងដៃ បុករះបង្កាន់ដៃស្ពានជាង២០ម៉ែត្រ រាបដល់ដី និងបន្តបុកម៉ូតូ ដែលបញ្ឈរទុកអូសធ្លាក់ចូលក្នុងទឹកទន្លេវ៉ៃគោជាមួយតែម្តង ។
ប្រភពខាងលើបានឱ្យដឹងទៀតថា ៖ ក្រោយពីបង្កហេតុរួចមក គេឃើញបុរសម្នាក់បានវារចេញតាមកញ្ចក់រថយន្ត ហែលទឹកឡើងលើគោក និងជិះម៉ូតូឌុបចេញទៅទិសខាងលិច បម្រុងហៅរថយន្តតាក់ស៊ីជិះគេចខ្លួន តែត្រូវបានសមត្ថកិច្ចតាមទាន់ ឃាត់ខ្លួនមកកាន់ការិយាល័យចរាចរណ៍ផ្លូវគោកនៃស្នងការដ្ឋានគនរបាលខេត្តស្វាយរៀង ។
អ្នកសាព័ត៌មានបានសួរពីមូលហេតុនៃការបើកបរធ្លាក់ទឹកនេះ តៃកុងរថយន្តបង្កគ្រោះថ្នាក់បានប្រាប់ថា៖ រូបគេមិនមែនជាតៃកុងរថយន្តបង្កនោះទេ គាត់គឺជាព្រូឡានតែប៉ុណ្ណោះ ហើយក្នុងហេតុការណ៍នេះ ក៏មិនដឹងដែរ ពោលគឺដេកក្នុងរថយន្តភ្ញាក់ឡើង ស្រាប់តែរថយន្តធ្លាក់ចូលទឹករួចទៅហើយ ។
បុរសសង្ស័យបានបន្តទៀតថា រូបគាត់ចេញពីរថយន្តជាមួយតៃកុង ហើយសួរតៃកុងថា មានរឿងអី បានធ្លាក់ទឹក តៃកុងប្រាប់ថា ងោកមួយភាំង ក៏បណ្តាលឲ្យរថយន្តរេចង្កូតបុករះបង្កាន់ដៃស្ពាន និងម៉ូតូធ្លាក់តែម្តង ៕ ដោយ ៖ វ៉ៃកូ
