បុរសជាឪពុកវ័យ ៧០ឆ្នាំបានសម្រេចចិត្តបើកបររថយន្តទម្លុះ “សមុទ្រភ្លើង” ភ្លាមៗដោយពុំមានអែរអង់ ។ ទង្វើនេះបានជួយពួកគេរួចផុតពីការស្លាប់ ។
តាមនោះលោក Justin Bilton និងឪពុកវ័យ ៧០ឆ្នាំ ឈ្មោះ Charlie កាលពីសប្តាហ៍មុន បានរួមគ្នាធ្វើដំណើរឆ្លងរដ្ឋ ២ (Wyoming និង Montana) ដើម្បីលំហែកម្សាន្ត ។ ពួកគេទៅដល់គោលដៅ បោះជំរុំសម្រាកនាឧទ្យានជាតិ Glacier ។
នៅថ្ងៃទី ១២ ខែសីហា ស្រាប់តែរន្ទះភ្លើងមួយ បានវាយចំតំបន់ព្រៃ ធ្វើឲ្យអគ្គិភ័យឆាបឆេះ រាលដាលភ្លាមៗ ។ ព្រៃរាប់ពាន់ហិកតា ត្រូវឆេះខ្ទេចខ្ទី ។
ភ្លាមៗនោះបុរសជាឪពុកសម្រេចចិត្តត្រូវទម្លុះព្រៃ ដែលកំពុងឆាបឆេះចេញភ្លាម វាជា… ច្រករស់ ។
ក្នុងអំឡុងពេលបើកបរចេញក្រៅ Justin ភ័យខ្លាចរថយន្តនឹងផ្ទុះព្រោះកម្តៅក្តៅខ្លាំងពេក ។ ប៉ុន្តែបុរសជាឪពុក មានស្មារតីហ្នឹងនរប្រាប់កូនថា ពួកគេនឹងរស់ពេលឆ្លងផុតចូលដល់ផ្លូវ…។
នៅពេលប្រទះដើមឈើកំពុងឆេះនៅទទឹងផ្លូវ Chalie បានសម្រេចប្រើស្រោមដៃប្រឆាំងភ្លើង ដើម្បីទាញវាចេញ បើកផ្លូវឲ្យរថយន្តទៅមុខ ។ ក្រោយមកពួកគេបានរត់ដល់បឹងមួយនៅខាងក្រោម រួចចាកចេញពីរថយន្ត ដែលឆេះខ្ទេចខ្ទីស្ទើទាំងស្រុង ។
ដល់ទីនោះ ក៏បានជួបនឹងភ្នាក់ងារសង្គ្រោះ២រូប ហើយត្រូវបានបញ្ជូនមកទីសុវត្ថិភាព ។
Justin ពោលប្រាប់ស្ថានីយ៍ទូរទស្សន៍ Boston WHDH ថា ៖ “ពេលជួបភ្នាក់ងារសង្គ្រោះ យើងបានងាកមើលក្រោយ ពិតជាគួរឲ្យតក់ស្លុត ! តែ ១៥នាទីសោះ តំបន់ព្រៃទាំងមូល ត្រូវបានគ្រប់គ្រងដោយ… អណ្តាតភ្លើង ! ៕ ចន្ទ្រា
