ខេត្តមណ្ឌលគិរី៖ សមត្ថកិច្ចនគរបាលខេត្តមណ្ឌលគិរី បានឲ្យដឹងថា មានប្តីប្រពន្ធ ២នាក់ បានស្លាប់យ៉ាងអាណោចអាធម និងបង្កភាពភ្ញាក់ផ្អើលដល់ប្រជាពលរដ្ឋ រស់នៅឃុំចុងផ្លាស់ ដោយសារតែភ្លើងប្រច័ណ្ឌ ហើយត្រូវបុរសជាប្តីបានយកគ្រាប់ច្នៃផ្ទុះស្លាប់យ៉ាងវេទនាទាំងប្តីប្រពន្ធ។
ហេតុការណ៍ខាងលើនេះ បានកើតឡើងនៅវេលាម៉ោង១៤ និង៥០នាទី ថ្ងៃទី២១ ខែសីហាឆ្នាំ២០១៨ នៅភូមិពូទុង ឃុំចុងផ្លាស់ ស្រុកកែវសីមា ខេត្តមណ្ឌលគិរី។សមត្ថកិច្ចបានអោយដឹងថា រឿងរ៉ាវខាងលើនេះ កើតឡើងដោយសារប្ដីប្រច័ណ្ឌប្រពន្ធ ព្រោះកន្លងមកគ្រួសារនេះតែងឈ្លោះប្រកែកគ្នា និងធ្លាប់ធ្វើអត្តឃាតពីរទៅបីដងរួចហើយតែមិនបានសំរេច។
មន្ត្រីនគរបាលឲ្យដឹងទៀតថា ការប៉ងធ្វើអត្តឃាតលើទី១ ដោយផឹកទឹកអាស៉ីត- លើកទី២ផឹកថ្នាំកណ្តៀ និងលើកទី៣ចងក។ ប៉ុន្តែលើកចុងក្រោយនេះ ការធ្វើអត្តឃាតដោយយកគ្រាប់កែច្នៃផ្ទុះស្លាប់តែម្តង។
ករណីខាងលើនេះ ជនរងគ្រោះទាំង២នាក់ប្តីប្រពន្ធ បានបន្សល់ទុកកូនប្រុសស្រីចំនួន ៤នាក់ ដោយកូនច្បងមានអាយុត្រឹម១៤ឆ្នាំតែប៉ុណ្ណោះ។
ស្នងការខេត្តមណ្ឌលគិរី លោក ឡោ សុខា ឲ្យដឹងថា ជនរងគ្រោះដែលផ្ទុះគ្រាប់កែច្នៃខាងលើ ប្តីមានឈ្មោះ ស៉ីម ធីប អាយុ ៣៧ឆ្នាំ ជនជាតិខ្មែរ មានស្រុកកំណើតភូមិព្រៃពន ឃុំរំលេច ស្រុកស៉ីធរកណ្តាល ខេត្តព្រៃវែង រស់នៅក្នុងភូមិឃុំកើតហេតុខាងលើ។ ចំណែកប្រពន្ធដែលស្លាប់បាត់បង់ជីវិតក្នុងហេតុការណ៍នេះដែរឈ្មោះ នឿន ឡែន អាយុ ៣២ឆ្នាំ ជាជនជាតិខ្មែរ មានស្រុកកំណើតភូមិ ដំណាក់ស្វាយ ឃុំល្វេ ស្រុកកោះសូទិន ខេត្តកំពង់ចាម មានទីលំនៅ ក្នុងភូមិឃុំកើតហេតុខាងលើ៕ ដោយ៖ សមុទ្រឈើ
