នៅថ្ងៃទី២១ ខែសីហា សមត្ថកិច្ចឥណ្ឌូណេស៊ីប្រកាសថា គេបានកម្ទេចចោលនាវាដែលជាកម្មសិទ្ធិរបស់បរទេស លួចចូលមកធ្វើអាជីវកម្មដែនទឹករបស់ខ្លួនចំនួន១២៥គ្រឿង។
រដ្ឋមន្ដ្រីក្រសួងសមុទ្រជលផលឥណ្ឌូណេស៊ី Susi Pudjiastuti ឱ្យដឹងថា សកម្មភាពនេះបំណងព្រមានដល់នាវានេសាទទាំងឡាយណាដែលមានបំណងនេសាទត្រីខុសច្បាប់នៅដែនសមុទ្រឥណ្ឌូណេស៊ី។
ការវាយពន្លិចនាវានេសាទ១២៥គ្រឿងខាងលើ ប្រព្រឹត្តទៅនៅទីតាំង១១កន្លែង ស្ថិតនៅទូទាំងប្រទេសកាលពីថ្ងៃទី២០សីហា។ បើគិតពីឆ្នាំ២០១៤មកទល់បច្ចុប្បន្ន ឥណ្ឌូណេស៊ីបានវាយពន្លិចនាវានេសាទសរុប៤៨៨គ្រឿង ដែលបំពានចូលដែនទឹក របស់ខ្លួន។
រដ្ឋមន្ដ្រីPudjiastuti ក៏បានសង្កត់ធ្ងន់ថា ឥណ្ឌូណេស៊ីនឹងបង្កើនកិច្ចការពារដែនសមុទ្ររបស់ខ្លួន តបតនឹងការបំពានធ្វើ អាជីវកម្មខុសច្បាប់របស់បណ្ដានាវាបរទេស៕
សូយន
