ព័ត៌មានពី AFP ស្ថាប័នថាមពលបរមាណូអន្ដរជាតិ(IAEA) ដែលជាអង្គការឃ្លាំមើលនុយក្លេអ៊ែររបស់ UN នៅថ្ងៃទី២១ខែសីហា ឱ្យដឹងថា IAEA ពុំបានពិនិត្យឃើញថាកូរ៉េខាងជើងបានផ្អាកសកម្មភាពនុយក្លែអ៊ែរ ទោះបីជាក្រុង ព្យុងយ៉ាងបានសន្យារំសាយនុយក្លេអ៊ែរនៅប្រទេសនេះក្ដី។
របាយការណ៍ IAEA ចុះផ្សាយថ្ងៃទី២១សីហា លើកឡើងច្បាស់ថា ការបន្ដនិងអភិវឌ្ឍន៍ខ្លាំងជាងមុននៃកម្មវិធីនុយក្លេអ៊ែររបស់កូរ៉េខាងជើងនិងបណ្ដាសេចក្ដីថ្លែងការណ៍ទាំងឡាយរបស់ក្រុងព្យុងយ៉ាង គឺជាដើមហេតុបង្កឡើងនូវកង្វល់យ៉ាងធ្ងន់ធ្ងរ។
ស្របពេលជាមួយគ្នានោះ អគ្គលេខាអង្គការសហប្រជាជាតិAntonio Guterres បានឱ្យដឹងនៅថ្ងៃទី២០សីហាថា លោកបានរៀបចំផែនការដើម្បីជជែកអំពីបណ្ដាវិធានការជំរុញឱ្យរំសាយនុយក្លេអ៊ែរនៅឧបទ្វីបកូរ៉េ ក្នុងកិច្ចប្រជុំជាមួយ បណ្ដាមេដឹកនាំពិភពលោកនាខែក្រោយនេះ៕
លីសា
