នៅក្នុងកិច្ចប្រឹងប្រែងកាត់បន្ថយប្រាក់បំណុលជាតិ ដែលកើនឡើងដល់ ២៥០ពាន់លានដុល្លារ រដ្ឋាភិបាលម៉ាឡេស៊ី របស់លោកមហាធៀរ ធ្លាប់បានសើរើ និងប្រកាសផ្អាកគម្រោងការសាងសង់ហេដ្ឋារចនាសម្ព័ន្ធជាច្រើន ដែលនៅក្នុងនោះមានផងដែរ គម្រោងការរបស់ក្រុមហ៊ុនរដ្ឋចិន នៅម៉ាឡេស៊ី ដែលមានតម្លៃ ២២ពាន់លានដុល្លារ។
សម្រាប់រដ្ឋាភិបាលថ្មីរបស់ម៉ាឡេស៊ី គម្រោងសាងសង់ភាគច្រើនដែលត្រូវបានដាក់ឲ្យដំណើរការ នៅក្នុងអាណត្តិរបស់រដ្ឋាភិបាលមុន គ្មានតម្លាភាព ហើយនិងអយុត្តិធម៌ខ្លាំងណាស់សម្រាប់ភាគីម៉ាឡេស៊ី ជាពិសេស គឺរឿងអត្រាការប្រាក់របស់ចិនតែម្តង ដែលមានកម្រិតខ្ពស់ជាងអត្រាដែលមានចែងនៅក្នុងកិច្ចសន្យា។
ក្នុងសន្និសីទកាសែតជាមួយសមភាគីចិន លោក មហាធៀរ មហាម៉ាត់ បានថ្លែងស្វាគមន៍ចិនដែលយល់ព្រមបង្កើនការនាំចូលផលិតផលកសិកម្មពីម៉ាឡេស៊ី ដូចជាផ្លែទុរេនជាដើម។ ប៉ុន្តែ ជាមួយគ្នានោះ នាយករដ្ឋមន្ត្រី របស់ម៉ាឡេស៊ីបានថ្លែងចង់បានផងដែរ ឲ្យរដ្ឋាភិបាលចិនសម្លឹងមើលបញ្ហា និងជួយម៉ាឡេស៊ី ដោះស្រាយបញ្ហាហិរញ្ញវត្ថុក្នុងស្រុកម៉ាឡេស៊ី។
សម្រាប់លោកមហាធៀរ មហាម៉ាត់ ទម្រង់ថ្មីនៃអាណានិគមកំពុងកើតមានសព្វថ្ងៃនេះ ព្រោះថា ប្រទេសក្រីក្រ មិនអាចប្រកួតប្រជែងជាមួយប្រទេសអ្នកមានបានទេនៅក្នុងក្របខ័ណ្ឌទីផ្សារសេរី។ “គេត្រូវតែមានផងដែរ ការដោះដូរដោយយុត្តិធម៌” នេះជាប្រសាសន៍របស់លោកមហាធៀរ នៅក្នុងសន្និសីទកាសែតជាមួយនាយករដ្ឋមន្ត្រីចិន លោក លី ខឺឈាំង។ លោកលី ខឺឈាំងវិញ បានថ្លែងសង្ឃឹមថា ប្រទេសទាំងពីរនឹងជញ្ជីងដោះដូរពាណិជ្ជកម្មស្មើភាពគ្នា។
នៅក្នុងដំណើរទស្សនកិច្ចរយៈពេល ៥ថ្ងៃ នៅប្រទេសចិន ប្រមុខរដ្ឋាភិបាលម៉ាឡេស៊ី បាននិយាយព្រមានផងដែរកុំឲ្យប្រទេសអ្នកមានប្រើធនធានរបស់ខ្លួន ដើម្បីកេងយកប្រយោជន៍ពីប្រទេសដែលមានការអភិវឌ្ឍយឺតជាងខ្លួន៕
សូយន