រាជធានីភ្នំពេញ ៖ ស្របពេលដែលបច្ចុប្បន្ននេះ មានបទល្មើសគ្រឿងមួយចំនួន ត្រូវបានប្រព្រឹត្តឡើង តាមវិស័យទូរគមនាគមន៍ផ្ញើសារតាមទូរស័ព្ទ និងប្រើកលល្បិចលាក់លួចបង្កប់ ក្នុងបញ្ញើប្រៃសណីយ៍នោះ មន្ត្រីមកពីអង្គការដៃគូ មន្ត្រីរាជការ និងប្រតិបត្តិករវិស័យប្រៃសណីយ៍ និងទូរគមនាគមន៍ នៅកម្ពុជា សរុប៤០០នាក់ ទទួលបានការបណ្តុះបណ្តាល នូវចំណេះដឹងបទពិសោធន៍ បញ្ហាគ្រឿងញៀន ពីថ្នាក់ដឹកនាំក្រុមបច្ចេកទេសការងារគ្រឿងញៀន-អេដស៍ ក្នុងអង្គសិក្ខាសាលា “យើងនាំគ្នាចូលរួមប្រយុទ្ធប្រឆាំងគ្រឿងញៀន ដើម្បីបញ្ចប់អេដស៍នៅឆ្នាំ២០២៥ “នៅថ្ងៃទី២១ ខែសីហា ឆ្នាំ២០១៨ ។
លោក ខាយ ឃុនហេង រដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានគណៈកម្មការប្រយុទ្ធប្រឆាំងគ្រឿងញៀន និងអេដស៍ បានលើកយកនូវបទពិសោធន៍ ដែលបានអនុវត្តក្នុងការងារប្រយុទ្ធប្រឆាំងគ្រឿងញៀន-អេដស៍ ក្នុងវិស័យប្រៃសណីយ៍និងទូរគមនាគមន៍នៅកម្ពុជា ដែលបានធ្វើការបង្ការទប់ស្កាត់ តាមវិស័យទូរគមនាគមន៍ផ្ញើសារតាមទូរស័ព្ទ និងទប់ស្កាត់បទល្មើសគ្រឿងញៀន ឆ្លងកាត់ព្រំដែន ដែលជនល្មើស ប្រើកលល្បិចលាក់លួចបង្កប់ ក្នុងបញ្ញើប្រៃសណីយ៍។
លោកឧត្តមសេនីយ៍ឯក នាក់ យុទ្ធា អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងថា យោងលើច្បាប់ ស្តីពីការត្រួតពិនិត្យគ្រឿងញៀន និងលិខិតបទដ្ឋានផ្សេងៗ ពាក់ព័ន្ធនឹងបញ្ហាគ្រឿងញៀន “ការងារប្រយុទ្ធប្រឆាំងគ្រឿងញៀន ត្រូវធ្វើជាពហុវិស័យ តាមតួនាទីភារកិច្ច របស់ក្រសួងស្ថាប័ន ជាសមាជិកហើយត្រូវការជាចាំបាច់ ការចូលរួមពីយើងទាំងអស់គ្នា ” និងបានលើកយកពីផលប៉ះពាល់ និងគ្រោះថ្នាក់នៃគ្រឿងញៀន មកបង្ហាញជូន ដើម្បីជាពុទ្ធិសម្រាប់ធ្វើការផ្សព្វផ្សាយបន្ត ទៅកាន់មនុស្សជាទីស្រឡាញ់ ។
លោក ហោ ប៊ុនឡេង អគ្គលេខាធិការរងអាជ្ញាធរជាតិប្រយុទ្ធ និងជំងឺអេដស៍ បានបញ្ជាក់ថា ការឆ្លងអេដស៍តាមរយៈការរួមភេទ លែងជាបញ្ហាទៀតទេ ប៉ុន្តែមានបញ្ហាការឆ្លងតាមរយៈការប្រើប្រាស់គ្រឿងញៀន ជាមួយគ្នានេះ ការបង្ការបញ្ហាគ្រឿងញៀនបាន គឺអាចបង្ការការឆ្លងមេរោគអេដស៍បាន ជាមួយគ្នាដែរ “គ្មានគ្រឿងញៀន គ្មានអេដស៍ ជាជម្រើសសម្រាប់លោកអ្នក “៕ ដោយ៖បញ្ញាស័ក្តិ