បេក្ខនារីបវរកញ្ញាហុងកុង នាង Tania Chan Yuen-ching ត្រូវបានគេរិះគន់ថាបានចូលរួមក្នុងសកម្មភាពកំពុងពេញនិយមមួយនៅលើអ៊ិនធើរណែត ដែលត្រូវបានគេស្គាល់ថាជា “Kiki challenge” ។
នៅក្នុងវីដេអូនៅលើ Instagram មានរយៈពេល ៣៥ វិនាទី ដែលឥឡូវនេះត្រូវបានលុបចោល នាង Chan ត្រូវបានឃើញចាកចេញពីរថយន្តរបស់នាង ខណៈរាំទៅតាមបទចម្រៀង “In My Feelings” របស់អ្នកចម្រៀងរ៉េបជនជាតិកាណាដា Drake ខណៈរថយន្តកំពុងចលនាយឺតៗ ។ នេះបើតាម South China Morning Post រាយការណ៍ឲ្យដឹង ។
ស្រីស្អាតវ័យ ២៣ ឆ្នាំ រូបនេះ បានអង្គុយបញ្ចេញកាយវិការជាមួយដៃរាំក្បាច់ហាត់កាយសម្ព័ន្ធ មុនពេលបើកទ្វាររថយន្តចុះ និងបន្តចាក់ក្បាច់រាំព្រមទាំងដៃនិងជើង ខណៈរថយន្តរំកិលទៅមុខយឺតៗ និងបន្ទាប់មក បានទាញខ្សែបូពណ៌ផ្កាឈូកចេញមកខាងក្រៅ… រួចឡើងជិះរថយន្តវិញ ។
អ្នកលេងអ៊ិនធើរណែតបានសម្តែងការពុំពេញចិត្តនឹងទង្វើរបស់ Chan ដែលបានចូលរួមលេងការប្រកួតប្រជែងបែបនេះឡើយ ។ អ្នកលេងអ៊ិនធើរណែតម្នាក់បានសរសេរថា៖ «ជំហានទី១ ខ្ញុំគិតថាវាគ្មានន័យអ្វីសោះឡើយ ហើយទង្វើដ៏ឆ្កួតៗបែបនេះអាចប្រឈមនឹងគ្រោះថ្នាក់ទៀតផង ។ ទី២ វីដេអូនេះ ពុំបានបង្ហាញឲ្យឃើញនាងរើសខ្សែបូពណ៌ផ្កាឈូករបស់នាងចូលក្នុងរថយន្តវិញទេ ដែលនេះជាសកម្មភាពមួយជំរុញឲ្យមានការពង្រាយសំរាមនៅទីសាធារណៈ» ។
ម្នាក់ទៀតសរសេរថា៖ «ពិតជាឡប់ៗមែនទែន! តើនាងសមជាបវរកញ្ញហុងកុងដ៏គំរូមួយរូបទេ ប្រសិនបើនាងបែរជាមកបង្ហាញឥរិយាបទបែបនេះ?» ។
Daily Mail រាយការណ៍ថា បន្ទាប់ពីមានប្រតិកម្មខ្លាំងក្លា បវរកញ្ញារូបនេះបានធ្វើការសុំទោស ទៅដល់អ្នកគាំទ្ររបស់នាង ចំពោះហេតុការណ៍ដែលនាងបានធ្វើឡើងកាលពីថ្ងៃពុធ ។
ខណៈដែលអាជ្ញាធរបានព្រមានពលរដ្ឋទាំងអស់ អំពីគ្រោះថ្នាក់ដែលអាចកើតមាននៃ «ការប្រកួតប្រជែងរបស់ Kiki», អ្នកខ្លះនៅតែរកវិធីដើម្បីធ្វើនិន្នាការសប្បាយរីករាយ និងប្រកបដោយសុជីវធម៌ និងភាពត្រឹមត្រូវ ដូចជាកសិករឥណ្ឌាដែលរាំជាមួយគោរបស់ពួកគេ ៕ ឧត្តម (nextshark)