អណ្តើករត់ប្រណាំងគ្នាជាមួយទន្សាយគឺជារឿងព្រេងកុមារ ដែលយើងគ្រប់គ្នាប្រាកដជាធ្លាប់បានលឺ និងធ្លាប់បានអាន កាលពីនៅតូចៗ។ នៅពេលលឺថា អណ្តើករត់ប្រណាំងជាមួយទន្សាយ គ្រប់គ្នាប្រាកដជាគិតថា ទន្សាយនឹងឈ្នះ ដោយសារតែវាជាសត្វរត់លឿន ខណៈអណ្តើកជាសត្វយឺតនិងវារបានយឺតៗ។
រឿងព្រេងកុមារនេះតែងតែត្រូវគេនិយាយតគ្នាពីជំនាន់មួយទៅជំនាន់មួយ ដោយសារតែវាផ្តល់ការអប់រំល្អ។
នៅពេលនេះ រឿងព្រេងមួយនេះបានក្លាយជារឿងពិតហើយ ដោយសារមានមនុស្សមួយក្រុមបានធ្វើការពិសោធន៍ ដោយឲ្យអណ្តើក និងទន្សាយរត់ប្រណាំងគ្នាមែនទែន ហើយលទ្ធផលពិជាគួរឲ្យភ្ញាក់ផ្អើល។
បើតាមវីដេអូបានបង្ហាញថា នៅពេលចាប់ផ្តើមប្រកួត ទន្សាយចាប់ផ្តើមរត់ទៅមុខដល់ពាក់កណ្តាលទី ខណៈអណ្តើកកំពុងវារមកយឺតៗ ហើយធ្វើឲ្យអ្នកគ្រប់គ្នាគិតថា ទន្សាយប្រាកដជាឈ្នះ ដោយសារវានាំមុខឆ្ងាយ ប៉ុន្តែអ្វីដែលធ្វើឲ្យពួកគេភ្ញាក់ផ្អើលនោះគឺថា ទន្សាយឈប់នៅស្ងៀមនៅពាក់កណ្តាលទី។
អណ្តើកខំបន្តដំណើរទៅមុខមិនឈប់សម្រាក រហូតដល់វាបានទៅដល់ទីផ្តាច់ព្រ័ត។ ក្នុងរឿងនេះ យើងអាចទទួលបានមេរៀនដ៏ល្អៈ “ការអត់ធ្មត់គឺជាដំណើរឆ្ពោះទៅរកភាពជោគជ័យ”។ “ត្រូវធ្វើដំណើរទៅមុខជានិច្ច ទោះបីអ្នកធ្វើដំណើរយឺតក៏ដោយ មិនយូរមិនឆាប់ អ្នកនឹងទៅដល់គោលដៅ”៕ សុភ័ក្ត្រ
ប្រភព៖ Trends Zilla
