ខេត្តស្វាយរៀង ៖ លោក រស់ ផារិទ្ធ អភិបាលរង ខេត្តស្វាយរៀង តំណាងលោកអភិបាលខេត្តនាព្រឹកថ្ងៃពុធ ១១កើត ខែស្រាពណ៌ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២២ ខែសីហា ឆ្នាំ២០១៨នេះ បានមានប្រសាសន៍ថាៈគណៈកម្មការដឹកនាំកំណែទម្រង់របស់រដ្ឋបាលខេត្តគឺជាយន្តការដ៏សំខាន់មួយ ដែលបង្កើតឡើងដើម្បីធានាដល់ការលើកកម្ពស់ការដឹកនាំ ការគ្រប់គ្រង ការសម្របសម្រួល និងការគាំទ្រដល់ការអនុវត្តកិច្ចដំណើរការកំណែទម្រង់វិមជ្ឈការ និងវិសហមជ្ឈការ នៅរដ្ឋបាលថ្នាក់ក្រោមជាតិសំដៅជំរុញការអភិវឌ្ឍសេដ្ឋកិច្ចមូលដ្ឋាន និងការផ្ដល់សេវាសាធារណៈនានា ឆ្លើយតបទៅនឹងតម្រូវការចាំបាច់ និងដោះស្រាយបញ្ហាប្រឈមជាអាទិភាពនានានៅមូលដ្ឋាន ចូលរួមចំណែកលើកស្ទួយជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ ។
លោកអភិបាលរងខេត្តបានមានប្រសាសន៏ដូច្នេះខណៈដែលលោកបានអញ្ជើញជាអធិបតីនៅក្នុងកិច្ចប្រជុំលើកដំបូងរបស់គណៈកម្មការដឹកនាំកំណែទម្រង់របស់រដ្ឋបាលខេត្តស្វាយរៀងនៅសាលប្រជុំ VIP សាលាខេត្ត មានរៀបចំកិច្ចប្រជុំលើកដំបូងរបស់គណៈកម្មការដឹកនាំកំណែទម្រង់របស់រដ្ឋបាលខេត្តស្វាយរៀង ព្រមទាំងមានការអញ្ជើញចូលរួមផងដែរពីសំណាក់លោកនាយករដ្ឋបាលសាលាខេត្តស្ដីទី លោកប្រធានមន្ទីរសេដ្ឋកិច្ច និងហិរញ្ញវត្ថុខេត្ត លោកប្រធានមន្ទីរមុខងារសាធារណៈខេត្ត តំណាងរតនាគារខេត្ត លោក លោកស្រីនាយកទីចាត់ការ និងប្រធានអង្គភាពសាលាខេត្ត និងមន្ត្រីពាក់ព័ន្ធដែលជាសមាជិក សមាជិការបស់គណៈកម្មការ សរុបចំនួន ១៤រូប ។
លោក រស់ ផារិទ្ធ បានមានប្រសាសន៍បន្តទៀតថា ក្នុងនាមលោកអភិបាលខេត្ត លោកអភិបាលរងខេត្ត ក៏បានធ្វើកាផ្ដាំផ្ញើដល់សមាជិក សមាជិកាគណៈកម្មការទាំងអស់់ ត្រូវខិតខំចូលរួមឲ្យសកម្មនៅក្នុងអនុវត្តតួនាទីភារកិច្ចដូចមានចែងក្នុងសេចក្ដីសម្រេចស្ដីពីការរៀបចំ និងប្រព្រឹត្តទៅនៃគណកម្មការដឹកនាំកំណែទម្រង់របស់រដ្ឋបាលខេត្តស្វាយរៀង ធ្វើយ៉ាងណាឲ្យគណៈកម្មការនេះមានដំណើរការប្រព្រឹត្តទៅដោយរលូន ទទួលបានលទ្ធផលជោគជ័យ និងប្រកបដោយប្រសិទ្ធភាព និងគុណផលការងារ ៕ ដោយ ៖ វ៉ៃកូ