តារាម៉ូដែលថៃដ៏ស្រស់ស្អាតមួយដួង បានកំពុងទទួលការកោតសរសើរជាខ្លាំង ពីសំណាក់មនុស្សជាច្រើននៅលើបណ្តាញសង្គម បន្ទាប់ពីបានបង្ហាញនូវសេចក្តីស្នេហាគ្មានលក្ខណ្ឌរបស់នាង ចំពោះមិត្តប្រុសរបស់នាងម្នាក់ដែលជាអ្នករត់ម៉ូតូឌុប ។
Coconuts បានរាយការណ៍ឲ្យដឹងថា ទំនាក់ទំនងរវាងតារាម៉ូដែលនាង Nutchanart Chaichan អាយុ ២២ ឆ្នាំ និងមិត្តប្រុសរបស់នាងឈ្មោះ Wutthichai Saeng-ngern អាយុ ២៥ ឆ្នាំ បានធ្វើឲ្យអ្នកលេងអ៊ីនធើរណែតចាប់អារម្មណ៍យ៉ាងខ្លាំង បន្ទាប់ពីរឿងស្នេហ៍របស់ពួកគេ ត្រូវបានបង្ហាញនៅលើទំព័រហ្វេសប៊ុកដ៏ល្បីល្បាញ YouLike ។
នាង Nutchanart បានសរសេរថា៖ «ហេតុអ្វីបានជាខ្ញុំជ្រើសរើសបុរសម្នាក់នេះ? ទោះបីពួកយើងខុសគ្នាគ្រប់យ៉ាងក៏ដោយចុះ តែអ្វីដែលពួកយើងមានរួមគ្នា គឺជាសេចក្តីស្រលាញ់របស់ពួកយើងចំពោះគ្នាទៅវិញទៅមក» ។
នាងបន្តថា៖ «អ្វីក៏ដោយឲ្យតែបងញ៉ាំកើត នោះអូនក៏អាចញ៉ាំបានដែរ ។ ទីកន្លែងណាដែលបងទៅ នោះអូនក៏នឹងទៅជាមួយបងដែរ ។ បងសុខចិត្តទទួលយការងារគ្រប់យ៉ាង ។ ហើយបងពុំដែលត្អូញត្អែរពីភាពនឿយហត់ទេ ។ អូនសប្បាយចិត្តខ្លាំងណាស់ នៅពេលបាននៅក្បែរបង!» ។
Nutchanart ដែលកំពុងមានទំនាក់ទំនងស្នេហាជាមួយ Wutthichai អស់រយៈពេល ៥ ឆ្នាំ មកហើយ ត្រូវបានគេដឹងថា ក៏បានទទួលការសើចចំអក និងការរិះគន់ច្រើនឆ្នាំផងដែរ ។ នាងបានសរសេរថា មនុស្សមិនគួរវិនិច្ឆ័យមនុស្សម្នាក់ដោយផ្អែកទៅលើលុយសំខាន់បែបនេះទេ ។
នាងបានបន្ថែមថា៖ «ស្នេហារបស់ពួកយើង បានរីកស្គុះស្គាយអស់រយៈពេល ៥ ឆ្នាំ មកហើយ ។ សូមកុំឲ្យតម្លៃទាបទៅលើបុរសម្នាក់ដែលធ្វើការទទួលបានប្រាក់ចំណូលតិចតួចអី ។ ពួកយើងទាំងពីរបានធ្វើការយ៉ាងលំបាកជាមួយគ្នា ។ ពួកយើងទទួលយកនូវអ្វីៗគ្រប់យ៉ាងដែលយើងមានរកបាន» ។
ខណៈពេលដែលថ្លៃសេវាម៉ូតូឌុប នៅក្នុងប្រទេសថៃ ទទួលបានត្រឹមតែ ១០ បាត (០.៣០ ដុល្លារអាមេរិក) ក្នុងមួយជើង នោះ Wutthichai អាចរកចំណូលបានប្រហែល ៥០០ បាត (១៥ ដុល្លារអាមេរិក) ក្នុង១ថ្ងៃ ។
Nutchanart បាននិយាយនៅក្នុងបទសម្ភាសន៍ថា នាងបានជួបមិត្តប្រុសម្នាក់នេះរបស់នាងនៅក្នុងឆ្នាំ ២០១៣ នៅក្នុងខេត្ត Nakhon Si Thammarat ដែលជាទឹកដីស្រុកកំណើតរបស់ពួកគេទាំងពីរ ។ យោងតាម Amarin TV ពួកគេក្រោយមក បានសម្រេចចិត្តផ្លាស់មកទីក្រុងបាងកក ជាមួយគ្នារួមរស់ជាប្តីប្រពន្ធជាមួយគ្នា ។
Wutthichai បាននិយាយថា រូបគាត់ និង Nutchanart បានចាប់ផ្តើមចាប់ដៃគ្នារកស៊ី តាមរយៈការលក់ខោអាវ និងស្បែកជើង នៅក្នុងតំបន់ Ramkhamhaeng ។ នៅពេលមុខរបរនេះពុំកាក់កប គាត់ក៏បានចាប់ផ្តើមរត់ម៉ូតូឌុប ខណៈមិត្តស្រីរបស់គាត់រកបានការងារលើកដំបូងរបស់នាងជាតារាម៉ូដែល ។
យោងតាម Wuttchichai ឥលូវនេះ គាត់អាចរកចំណូលបានប្រហែល ១៥,០០០ បាត (៥០០ ដុល្លារ) ក្នុង១ខែ ។
Nutchanart និយាយថា៖ «ខ្ញុំមិនមែនការខ្មាស់អៀនអ្វីទាល់តែសោះ ។ ព្រោះគាត់ធ្វើការងារល្អ និងជាការងារសុច្ចរិត» ។
សូមបញ្ជាក់ថា គូស្នេហ៍គួរឲ្យកោតសរសើរនេះ ដែលបានកំពុងសន្សំលុយរួមជាមួយគ្នា បានបង្ហើបឲ្យដឹងថា ពួកគេមានគម្រោងទទួលយកជីវិតថ្មី និងមានកូននឹងគេនៅថ្ងៃអនាគតឆាប់ៗខាងមុខនេះ ៕ ចន្ទី (nextshark)
