កណ្តាល៖ នគរបាលក្រុងតាខ្មៅ បានចាប់ខ្លួនជនសង្ស័យ៤នាក់ ក្នុងករណីហិង្សាដោយចេតនាមានស្ថានទម្ងន់ទោស (ដោយសារមរណភាពនៃជនរងគ្រោះ) ដែលកើតឡើងដោយជម្លោះគប់ដំថ្ម ទើបជនសង្ស័យជិះម៉ូតូ ដេញបុកជនរងគ្រោះ បណ្តាលឲ្យដួល និងវាយជនរងគ្រោះបន្ថែមទៀត ប៉ុន្តែដោយសារជនរងគ្រោះ មានសភាពរបួសធ្ងន់ធ្ងរ ត្រូវបញ្ជូនទៅព្យាបាល នៅមន្ទីរពេទ្យរុស្ស៊ី ហើយបានដាច់ខ្យល់ស្លាប់តែម្តង។
ករណីនេះ កើតហេតុ នៅថ្ងៃទី២២ខែសីហា ឆ្នាំ២០១៨ ម៉ោង១៣និង២០នាទី នៅចំណុចរង្វង់មូលតាខ្មៅភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល។
នគរបាលក្រុងតាខ្មៅ បានបញ្ជាក់ថា ជនរងគ្រោះដែលស្លាប់ ឈ្មោះ ប៉ែន រិទ្ធារាជ្យ ភេទប្រុស អាយុ១៨ឆ្នាំ ទីលំនៅភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរជាសិស្ស (រងរបួសបាក់ធ្មេញ១ និងរយះបបូរមាត់)។ ចំណែកជនល្មើសមានចំនួន៤នាក់ ១-ឈ្មោះ ស្លេះ រុំម៉ាលី ភេទប្រុស អាយុ១៧ឆ្នាំ ជនជាតិខ្មែរឥស្លាម ទីលំនៅភូមិព្រែកតាពៅ១ សង្កាត់ដើមមៀនក្រុងតាខ្មៅ ខេត្តកណ្តាល មុខរបរកម្មកររោងចក្រ ត្រូវឃាត់ខ្លួន។ ២-ឈ្មោះលាស់ ខរី ភេទប្រុស អយុ១៨ឆ្នាំ ជនជាតិខ្មែរឥស្លាម ទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរមិនពិតប្រាកដ ត្រូវឃាត់ខ្លួន។ ៣-ឈ្មោះអាលី មីហ្សាន ភេទប្រុស អាយុ១៧ឆ្នាំ ជនជាតិខ្មែរឥស្លាម ទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរ កម្មកររោងចក្រ ត្រូវឃាត់ខ្លួន។ ៤-ឈ្មោះម៉ាត់ ស្មាអ៊ែល ភេទប្រុស អាយុ១៥ឆ្នាំ ជនជាតិខ្មែរឥស្លាម ទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរមិនពិតប្រាដ ត្រូវឃាត់ខ្លួន។ វត្ថុតាងចាប់យក៖ ម៉ូតូ១គ្រឿងម៉ាក HONDA ១២៥ ពណ៌ខ្មៅ ស៊េរី២០១៥ ពាក់ស្លាកលេខ កណ្តាល 1S-679 (បែកចង្កៀង ក្បាំង កញ្ចក់ខាងស្តាំ និងគម្របភក់ខាងមុខ)។
នគរបាលក្រុងតាខ្មៅ បានបញ្ជាក់ពីសភាពនៃរឿងហេតុនេះថា មុនពេលកើតហេតុ ក្រុមជនល្មើសកំពុងតែអង្គុយលេង លើម៉ូតូនៅចំណុចអ្នកតាថៃជឺមាត់ទន្លេ ស្រាប់តែជនរងគ្រោះបានជិះម៉ូតូមកគប់ក្រុមជនល្មើស ធ្វើអោយជនល្មើសខឹង ក៏បានជិះម៉ូតូដេញតាមដល់កន្លែងកើតហេតុខាងលើ ស្រាប់តែជនល្មើជិះម៉ូតូបុកម៉ូតូជនរងគ្រោះពីក្រោយ ធ្វើអោយម៉ូតូទាំងពីរជ្រុលចង្កួត ទៅបុកខឿនលោកតាម៉ៅ ដួលបោកទាំងសងខាង បន្ទាប់មកជនល្មើសក៏ស្ទុះទៅទាត់ធាក់ជនរងគ្រោះបន្ថែមទៀត បណ្តាលអោយរងរបួសបាក់ធ្មេញ និងរយះបបេមាត់ ត្រូវបានក្រុមគ្រួសារដឹកយកទៅព្យាបាលនៅមន្ទីរពេទ្យរុស្សី តែដោយសារជនរងគ្រោះរបួសគ្រាំក្នុង ធ្ងន់ធ្ងរពេក មិនអាចសង្គ្រោះបានក៏បានចាច់ខ្យល់ស្លាប់តែម្តង។
រីឯជនល្មើសត្រូវបានសមត្ថកិច្ចធ្វើឃាត់ខ្លួនបញ្ជូនមកកាន់អធិការដ្ឋាននគរនបាលក្រុងតាខ្មៅដើម្បីចាត់ការតាមនីតិវិធី៕ ដោយ៖កូឡាប
