ភ្នំពេញ៖ អភិបាលរាជធានីភ្នំពេញ បានសន្យាថា យ៉ាងយូររយៈពេល១ខែទៀត អាជ្ញាធររាជធានីភ្នំពេញ នឹងផ្តល់ប័ណ្ណកម្មសិទ្ធិស្របច្បាប់ ជូនដល់បងប្អូនប្រជាពលរដ្ឋ នៅសហគមស្ទឹងមានជ័យ ដើម្បីផ្តល់ភាពកក់ក្តៅដល់បងប្អូន ក្នុងការរស់នៅក្នុងគម្រោងអភិវឌ្ឍន៍ នៅនឹងកន្លែងរបស់រដ្ឋបាលរាជធានីភ្នំពេញ នៅប្រឡាយស្ទឹងមានជ័យ។
ក្នុងសិក្ខាសាលាស្ដីពីការត្រួតពិនិត្យតាមដាននិងការគាំទ្រដល់ការអនុវត្តសកម្មភាពពាក់ព័ន្ធនិងការលើកកម្ពស់ភាពធន់របស់សហគមន៍ក្រីក្រ នៅព្រឹកថ្ងៃទី២៣វិច្ឆិកាលោក លោកឃួង ស្រេង អភិបាលរាជធានីភ្នំពេញ បានថ្លែងបន្តថា ការអភិវឌ្ឍន៍ប្រឡាយស្ទឹងមានជ័យយើងនឹងទទួលបានផលប្រយោជន៍២យ៉ាង ៖ ទី១ ប្រជាពលរដ្ឋទទួលបានប្លង់កម្មសិទ្ធិស្របច្បាប់ ទី២ យើងបានបើកមុខទឹកឲ្យបានទូលាយ ធ្វើឲ្យទឹកហូរបានលឿន។
លោកឃួង ស្រេង ក៏បានព្រមានធ្ងន់ៗទៅលើមន្ត្រីណាដែលចាប់ដីរដ្ឋនៅតំបន់មិនរៀបរយមកធ្វើជាកម្មសិទ្ធិផ្ទាល់ខ្លួន រួចជួលឲ្យប្រជាពលរដ្ឋក្រីក្ររស់នៅវិញនោះ ត្រូវដកខ្លួនថយហើយប្រគល់ដីនោះមកអោយរដ្ឋវិញជាបន្ទាន់ជៀសវាងត្រូវប្តឹងឡើងតុលាការ។ ជាមួយគ្នានេះ អាជ្ញាធរខណ្ឌ សង្កាត់ត្រូវចុះតាមខ្នងផ្ទះប្រជាពលរដ្ឋ ជំរុញការធ្វើអត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅឲ្យបានម៉ត់ចត់ លឿននិងមានតម្លាភាពដោយមិនត្រូវយកលុយពីប្រជាពលរដ្ឋ ឡើយ។
លោកបានបញ្ជាក់ទៀតថា ពេលនេះដល់ម៉ោងត្រូវព្យាបាលមន្ត្រីដែលអសកម្មហើយ ហើយបើអស់លោកណាមិនព្រមកែចំណុចអសកម្មចេញទេ មានអ្នកផ្សេងគេចង់ធ្វើច្រើនទៀត។ បងប្អូនប្រជាពលរដ្ឋក្នុងសហគមក្រីក្រក្នុងរាជធានីភ្នំពេញ កំពុងទទួលបានលទ្ធផលនៃសន្តិភាព និងការអភិវឌ្ឍន៍ក្រោមការដឹកនាំរបស់សម្តេចតេជោហ៊ុន សែន ប្រកបដោយសុឆន្ទៈ និងទទួលខុសត្រូវពីសុខទុក្ខរបស់ប្រជាពលរដ្ឋ ក្នុងនោះសម្តេចបានដាក់ចេញគោលនយោបាយអភិវឌ្ឍន៍សហគមក្រីក្រ១០០សហគមក្នុងមួយឆ្នាំតាំងពីឆ្នាំ២០០៣។ ការបម្រើប្រជាពលរដ្ឋ ការអភិវឌ្ឍន៍មូលដ្ឋាន ការដោះស្រាយការលំបាកនានាជូនប្រជាពលរដ្ឋគឺកូនចៅតេជោជាអ្នកធ្វើ មិនមានបាតដៃបក្សប្រឆាំងរួមចំណែកនោះទេ។ សូមបញ្ជាក់ថា សហគមក្រីក្រក្នុងរាជធានីភ្នំពេញបច្ចុប្បន្នមានចំនួន២០៥សហគម មាន១៧.១៧៩ខ្នងផ្ទះ មាន១៩.២១៥គ្រួសារ នៅក្នុង១៣០ភូមិ និង៥០សង្កាត់ ក្នុងខណ្ឌចំនួន១១ ក្នុងរាជធានីភ្នំពេញ៕ ដោយ៖កូឡាប
