មេបញ្ជាការការពាររដ្ឋធានីរបស់កូរ៉េខាងត្បូង បានសុំធ្វើការអភ័យទោស បន្ទាប់ពីវីដេអូមួយបានបង្ហាញតារាម៉ូដែលម្នាក់ ស្ថិតក្នុងឈុតប៊ីគីនីនៅលើឆាក ក្នុងអំឡុងពេល «សម្តែងលើកទឹកចិត្ត» ដល់ទាហាន បានបង្កការខឹងសម្បារនៅលើអ៊ីនធើរណែត ។
វីដេអូដ៏ចម្រូងចម្រាសនេះ ត្រូវបានបង្ហោះទៅកាន់ YouTube នៅលើឆាណែល Korea’s Liberation Day កាលពីថ្ងៃទី១៥ សីហា ហើយវាទទួលបានការចូលទស្សនាជាង ៦០,០០០ ដង ដោយក្នុងនោះអ្នកប្រើប្រាស់បានធ្វើការចោទប្រកាន់ព្រឹត្តិការណ៍នេះថាចាត់ទុកស្ត្រីដូចជាឧបករណ៍, នេះបើយោងតាម Korea Herald ។
ស្រីស្អាតអាយុ ២១ ឆ្នាំ នោះដែលគេជឿថាជាតារាម៉ូដែល និងគ្រូបង្ហាត់ហាត់ប្រាណ អាចត្រូវបានឃើញស្លៀកឈុតប៊ីគីនីកំប៉ិតរ ខណៈនាងដើរកាច់រាងទៅតាមចង្វាក់ភ្លេង ក្រោមការស្រែកអបអរលើកទឹកចិត្តនាងយ៉ាងកងរំពងពីទាហាន ។
អ្នក YouTube ម្នាក់បានសរសេរថា៖ «នេះជារឿងហួសពិការភ្ញាក់ផ្អើលតែម្តង ។ តើនេះជាប្រភេទនៃសម្តែង ‘លួងចិត្ដ’ ឆ្នាំ២០១៨? តើអ្វីពិតប្រាកដទៅ ដែលកំពុងត្រូវបានលួងចិត្តនៅទីនេះ?» ។
ញត្តិតាមអ៊ិនធរណេតត្រូវបានបង្កើតឡើង ដើម្បីអំពាវនាវឱ្យហាមឃាត់ការសម្តែងសម្រាប់យោធានាប្រភេទនេះនាពេលអនាគត ។ ញត្តិដែលត្រូវបានបង្ហោះលើ President.Go.Kr បានទទួលហត្ថលេខាជាង ១៧,០០០ រួចហើយ ។
ទោះយ៉ាងណា ញតិប្រឆាំងមួយដែលក៏បានលេចឡើងនៅលើគេហទំព័រមួយកាលពីថ្ងៃចន្ទ បានស្នើសុំរដ្ឋាភិបាល «ពុំត្រូវស្ថិតក្រោមឥទ្ធិពលរបស់ពួកក្រុមស្ត្រីនិយម និងស្តារកងទ័ពឡើងវិញ ចំពោះរដ្ឋដើមរបស់ខ្លួន» ។ ញតិនេះទើបទទួលបានហត្ថលេខ ១៧ ប៉ុណ្ណោះ ចាប់តាំងពីវាទទួលបានការចាប់អារម្មណ៍ ។
ញត្តិនៅលើគេហទំព័រ Cheong Wa Dae ត្រូវតែទទួលបានហត្ថលេខាជាង ២០០,០០០ ក្នុងរយៈពេល ៣០ ថ្ងៃ ដើម្បីឱ្យការិយាល័យប្រធានាធិបតី ចេញសេចក្តីថ្លែងការណ៍ជាផ្លូវការមួយ ។ ប៉ុន្តែ មេបញ្ជាការការពាររដ្ឋធានីកងទ័ព បានចេញការសុំទោសជាសាធារណៈ បន្ទាប់ពីមានភាពចម្រូងចម្រាសនេះឡើង ៕ ឧត្តម (nextshark)
