គេហទំព័រ Shanghaiist បានរាយការណ៍នៅពីថ្ងៃទី២២ សីហា ឲ្យដឹង កាលពីព្រឹកថ្ងៃសៅរ៍ចុងសប្តាហ៍មុននេះ គិលានុបដ្ឋាកវ័យក្មេងម្នាក់បានរៀបមង្គលការជាមួយមិត្តភក្តិរបស់នាង នៅក្នុងទីក្រុង Dalin ប្រទេសចិន ។ ប៉ុន្តែ ក្នុងអំឡុងពេលនៃដំណើរកម្សាន្ត ស្រាប់តែហេតុការណ៍គ្រោះថ្នាក់រថយន្តមួយបានកើតឡើងនៅលើដងផ្លូវ ដែលរថយន្តរបស់នាងកំពុងឆ្លងកាត់ ។
ភ្លាមៗនោះ គិលានុបដ្ឋាកចិត្តធម៌ម្នាក់នេះ ដែលស្ថិតក្នុងឈុតអាពាហ៍ពិពាហ៍ បានស្នើអ្នកបើកបរឈប់រថយន្ត មុនពេលនាងប្រញាប់ប្រញាល់ទៅជួយសង្គ្រោះជនរងគ្រោះដែលកំពុងសន្លប់ស្តូកស្តឹងនៅលើដងផ្លូវ តាមរយៈការជួយសម្រួលចលនាបេះដូង ។
បន្ទាប់ពីបានប្រើប្រាស់ជំនាញពេទ្យរបស់នាង ក្នុងការធ្វើឲ្យជនរងគ្រោះត្រឡប់មកស្ថានភាពដឹងខ្លួនវិញ នាងក៏បានឡើងរថយន្តបន្តដំណើររបស់នាងទៅកាន់ទីកន្លែងកម្សាន្តអាពាហ៍ពិពាហ៍ ។
ប៉ុន្តែ គួរឲ្យសោកស្តាយមែនទែន ដែលព័ត៌មានក្រោយមក ត្រូវបានគេរាយការណ៍ឲ្យដឹងថា ជនរងគ្រោះបានស្លាប់ខណៈបញ្ជូនដល់មន្ទីរពេទ្យ ដោយសារតែពុំអាចទ្រាំទ្រនឹងរបួសប៉ះទង្គិចធ្ងន់ធ្ងរពេក ។
ទោះយ៉ាងណា គិលានុបដ្ឋាកម្នាក់នេះ បានទទួលការកោតសរសើរយ៉ាងខ្លាំង បន្ទាប់ពីសកម្មភាពនៃទង្វើដ៏ល្អរបស់នាង ត្រូវបានបង្ហោះចែករំលែកនៅលើបណ្តាញសង្គម ។ អ្នកលេងអ៊ីនធើរណែតជាច្រើនបានផ្តល់ឈ្មោះឲ្យនាងថាជា «វីរនារី» ហើយពួកគេថែមទាំងនិយាយថា៖ «កូនកំលោះម្នាក់នោះ ពិតជាបុរសមានសំណាងមែន ដែលបាននាងធ្វើជាប្រពន្ធ!!» ៕ ចន្ទី (khaosod)