ខេត្តព្រះសីហនុ ៖ ប្រធានសាខាគយនិងរដ្ឋាករខេត្តព្រះសីហនុ លោក ទុំ ណូ បានឲ្យដឹងថា កាលពីរសៀលថ្ងៃទី២៣ ខែសីហា ឆ្នាំ២០១៨ មន្ត្រីសាខាគយ និងរដ្ឋាករខេត្តព្រះសីហនុ ដោយមានការសម្របសម្រួលពីលោកស្រីព្រះរាជអាជ្ញាអមសាលាដំបូងខេត្តព្រះសីហនុ និងចូលរួមពីសមត្ថកិច្ចកងរាជអាវុធហត្ថខេត្ត ព្រមទាំងអាជ្ញាធរដ្ឋបាលខេត្តព្រះសីហនុ។
កម្លាំងជំនាញ បានចុះឃាត់រថយន្តគ្មានពន្ធ ០១គ្រឿង ម៉ាក Mercedes ពណ៌ស ចង្កូតឆ្វេង ដែលមានម្ចាស់ជាជនជាតិចិន។
លោក ទុំ ណូ បន្តថា រថយន្តគ្មានព័ន្ធខាងលើនេះ ប្រើប្រាស់ស្លាកលេខក្លែងក្លាយ មានលេខ ព្រះសីហនុ 2A-3800 ហើយចតនៅមុខហាងលក់ទំនិញមួយកន្លែង តាមផ្លូវឯករាជ្យ ក្នុងសង្កាត់២ ក្រុងព្រះសីហនុ។
លោក ទុំ ណូ ប្រធានសាខាគយ និងរដ្ឋាករខេត្តព្រះសីហនុ បានបញ្ជាក់ថា រថយន្ត ១គ្រឿងខាងលើនេះ នឹងនាំយកទៅរក្សាទុកនៅអង្គភាពសាខាគយ និងរដ្ឋាករខេត្ត ដើម្បីបន្តនីតិវិធីតាមផ្លូវច្បាប់។
លោកសង្កត់ធ្ងន់ថា ប្រតិបត្តិការនេះធ្វើឡើង ក៏ដើម្បីទប់ស្កាត់ការបន្លំគេចពន្ធពីម្ចាស់យានយន្តគ្រប់ប្រភេទ ដូចដែលសាខាគយ និងរដ្ឋាករខេត្តព្រះសីហនុ ធ្លាប់បានអនុវត្តន៍នាពេលកន្លងមកទៅ នៅតាមកន្លែងលក់យានយន្តមួយចំនួន មានទីតាំងក្នុងខេត្តព្រះសីហនុ ប្រយោជន៍ឈានទៅប្រមូលប្រាក់ពន្ធតាមច្បាប់បង់ពន្ធ ដើម្បីបង្កើនចំណូលថវិការជាតិ៕ ដោយ៖ ដែន សីមា
