តាម AFP ថ្ងៃទី ២០ ខែសីហា កន្លងមកតុលាការកំពុងហុងកុង បានកាត់ក្តីរឿង Khaw Kim-Sun អាយុ ៥៣ឆ្នាំ ជាវេជ្ជបណ្ឌិតផ្នែកសណ្តំ បានចេតនាសម្លាប់ប្រពន្ធនិងកូនស្រីដោយប្រើពោងខ្យល់ហាត់ yoga ដែលបញ្ចូលឧស្ម័ន Carbon Monoxide ។
សាកសពរបស់ជនរងគ្រោះត្រូវបានរកឃើញនៅក្នុងរថយន្ត Mini Cooper ចតក្បែរផ្លូវ នៅសង្កាត់ Sai King ហុងកុង កាលពីថ្ងៃទី ២២ ខែឧសភា ឆ្នាំ ២០១៥ ។
របាយការណ៍របស់អយ្យការឲ្យដឹងថា ភរិយា និងកូនស្រីរបស់ Khaw ត្រូវបានរកឃើញនៅក្នុងរថយន្ត Mini Cooper បិទទ្វារជិតពណ៌លឿង នៅហុងកុង ថ្ងៃទី ២២ ខែឧសភា ឆ្នាំ២០១៥ ។ Wong Siew-fung អាយុ ៤៧ ឆ្នាំ ជាភរិយា និង Khaw li-ling អាយុ ១៦ឆ្នាំ ជាកូនស្រីត្រូវបានស្លាប់នៅពេលសង្គ្រោះនៅឯមន្ទីរពេទ្យរបស់ “ឃាតករ” ជាឪពុកធ្វើការ ។ មូលហេតុគឺអ្នកទាំង ២ បានហិតឧស្ម័ន Carbon Monoxide ។
ប៉ូលិសបានរកឃើញពោងហាត់ yoga ១ ដែលអស់ខ្យល់នៅក្រោយរថយន្ត ។ Khaw ពុំព្រមសារភាពពីទង្វើសម្លាប់មនុស្សទេ ហើយថា កូនស្រីខ្លួនមានបំណងធ្វើអត្តឃាត ។ ប៉ុន្តែគ្រូៗ របស់ Li-Ling បានវាយតម្លៃថា នាងជានារីម្នាក់ មានស្មារតីល្អ រួសរាយ ។
Khaw Kim-Sun ត្រូវបានចាប់ខ្លួននៅខែ កញ្ញា ឆ្នាំ ២០១៧ ។
អយ្យការឲ្យដឹងថា មុនពេលកើតហេតុ Khaw បានសហាយស្មន់ជាមួយនិស្សិតម្នាក់ ហើយភរិយាគាត់ពុំព្រមលែងលះ ។ Khaw ពុំមានបំណងសម្លាប់កូនស្រីទេ ព្រោះមុនពេលកើតហេតុវាបានប្រាប់កូនឲ្យនៅផ្ទះធ្វើកិច្ចការសាលា ។
អ្នកធ្វើការជាមួយបានឃើញ Khaw ប៊ូមឧស្ម័នពុលនេះចូលក្នុងពោងកៅស៊ូ២ តែ Khaw បាននិយាយថា ខ្លួនចង់ធ្វើពិសោធន៍ជាមួយទន្សាយ ប៉ុន្តែពេលប៉ូលិសសាកសួរឧក្រិដ្ឋជនរូបនេះ បានឆ្លើយថា ខ្លួនយកវាមកសម្លាប់កណ្តុរនៅផ្ទះ ។ ប៉ុន្តែគ្រួសារ Khaw អះអាងថា នៅផ្ទះខ្លួនពុំដែលមានកណ្តុរទេ ។
ការកាត់ទោសកំពុងបន្ត ចាំមើលតើឧក្រិដ្ឋជនយង់ឃ្នង ព្រោះតែងប់ងល់នឹងកាមគុណ បែរជាសម្លាប់ប្រពន្ធកូនរបស់ខ្លួននឹងទទួលវាសនាយ៉ាងណាទៅ?! ៕ លីសា
