បន្ទាប់ពីហ្វីលីពីនសម្ដែងពីកង្វល់អំពីចិនដែលបញ្ជូនអាវុធនុយក្លេអ៊ែរទៅកាន់សមុទ្រចិនខាងត្បូងនោះ អ្នកនាំពាក្យក្រសួងការបរទេសវៀតណាមNguyễn Phương Trà បានលើកឡើងច្បាស់ថា៖ «វៀតណាមចាត់ទុកថាការរក្សាសន្ដិភាព ស្ថិរភាព សន្ដិសុខ សុវត្ថិភាពនាវាចរណ៍និងអាកាសចរណ៍នៅសមុទ្រចិនខាងត្បូង គឺជាផលប្រយោជន៍រួម ហើយក៏ជាភារកិច្ច កាតព្វកិច្ចរបស់បណ្ដាប្រទេសក្នុងតំបន់និងលើពិភពលោក។ដូច្នេះបណ្ដាភាគី ដែលពាក់ព័ន្ធសុទ្ធតែមានកាតព្វកិច្ចរួមចំណែកសម្រាប់គោលដៅនេះ»។
មុននោះមួយថ្ងៃ អ្នកនាំពាក្យវិមានប្រធានាធិបតីហ្វីលីពីន Harry Roque បានថ្លែងក្នុងសន្និសីទសារព័ត៌មានថា៖ «យើងខ្ញុំមានកង្វល់អំពីលទ្ធភាពដែលប្រទេសណាក៏ដោយនៅក្រៅតំបន់ដូចជា អាមេរិក រុស្ស៊ីនិងចិន អាចនាំក្បាលគ្រាប់ នុយក្លេអ៊ែរចូលមកកាន់បូរណភាពដែនដីហ្វីលីពីន ឬតំបន់អាស៊ាន ដែលជាកន្លែងត្រូវបានប្រកាសថាជាតំបន់គ្មានអាវុធនុយក្លេអ៊ែរ។
រូបចិនប្រកាសរូបភាពសមយុទ្ធទ័ពចម្រុះកាលពីថ្ងៃទី១៨សីហា
ក្នុងពេលនោះដែរ ក្រសួងការពារជាតិអាមេរិកបានសរសេរក្នុងរបាយការណ៍ផ្ញើជូនរដ្ឋសភាប្រទេសនេះកាលពីថ្ងៃទី១៦សីហា សង្កត់ធ្ងន់ថា ល្បឿនអភិវឌ្ឍន៍យោធា សេដ្ឋកិច្ចនិងការទូតរបស់ចិន កំពុងបង្កើនឥទ្ធិពលយ៉ាងខ្លាំងលើឆាកអន្តរជាតិ បំណងបង្កើនអានុភាពត្រួតត្រាតំបន់៕
សូយន
