កំពូលព្យុះLane កំពុងឆ្ពោះទៅកាន់ប្រជុំកោះហាវ៉ៃអាមេរិក ដែលមានកម្លាំងខ្យល់រហូតដល់215 km/h ហើយជាព្យុះខ្លាំង បំផុតក្នុងអំឡុង២៥ឆ្នាំកន្លងមក។
មកទល់ព្រឹកព្រលឹមថ្ងៃទី២៣សីហា (ម៉ោងនៅហាវ៉ៃ )ព្យុះនេះស្ថិតនៅចម្ងាយពីកោះហាវ៉ៃប្រមាណ៣៧០គីឡូម៉ែត្រ។ តាមស្ថាប័នឧតុនិយមជាតិអាមេរិក (NWS), ព្យុះនេះអាចបង្កឱ្យមានភ្លៀងកម្រិត500 mm និងធ្វើឱ្យមានការបាក់ស្រុតដី។នៅតាមបណ្ដោយឆ្នេរសមុទ្រ វាអាចបង្កឱ្យមានរលកធំៗ ហើយនិងការបាក់ច្រាំងបណ្ដាលឱ្យមានគ្រោះថ្នាក់។
តាំងពីថ្ងៃទី២២សីហាម្ល៉េះ ពលរដ្ឋហាវ៉ៃបាននាំគ្នាសម្រុកទៅកាន់ហាងលក់ទំនិញដើម្បីទិញស្ដុកទុកនូវរបស់របរចាំបាច់ ត្រៀមបម្រុងនឹងការវវាយលុករបស់ព្យុះLane ។
ទំនិញតាមហាងត្រូវបានប្រមូលយកអស់ស្ទើរតែគ្មានសល់អ្វី
ពិសេសគឺអាហារ និងភេសជ្ជៈ
ស្ថាប័នរដ្ឋាភិបាលនិងសាលារៀនបានបិទទ្វារនៅថ្ងៃទី២៣សីហា(ម៉ោងតំបន់)
អភិបាលរដ្ឋហាវ៉ៃបានប្រកាសឱ្យពលរដ្ឋស្ថិតនៅក្នុងផ្ទះដើម្បីចៀសវាងគ្រោះថ្នាក់ជាយថាហេតុ។ទូកតូចៗរបស់ពលរដ្ឋ ត្រូវបានលើកដាក់ឡើងច្រាំង ក្នុងពេលដែលនាវាប្រយុទ្ធរបស់អាមេរិកបានចាកចេញពីកំពង់ផែ ដើម្បីបញ្ចៀសការខូចខាតដោយសារព្យុះ។ នៅថ្ងៃទី២៣សីហានេះដែរ ប្រធានាធិបតីអាមេរិកបានប្រកាសស្ថានការណ៍ គ្រាមានអាសន្ននៅរដ្ឋហាវ៉ៃ ហើយសំណូមពរឱ្យរដ្ឋាភិបាលសហព័ន្ធឧបត្ថម្ភស្បៀងអាហារចាំបាច់ដល់ពលរដ្ឋ។
ក្នុងប្រវតិ្ដសាស្ដ្រ ព្យុះកម្រិត៥ ទើបមានជាលើកទី២ចំពោះកោះនេះ។ ព្យុះ Iniki នៅឆ្នាំ១៩៩២ បានសម្លាប់មនុស្សអស់៦នាក់ និងបំផ្លាញផ្ទះអស់១៤០០០ខ្នង៕
លីសា