កាលពីថ្ងៃ១៨សីហា បុរសត្រកូលថាង រស់នៅទីក្រុងចេងឌូ ប្រទេសចិន បាននាំមិត្ដស្រីត្រកូលយ៉ាង និងបងប្រុស២នាក់ របស់នាងទៅកាន់ហាងលក់រថយន្ដមួយហើយប្រកាសថានឹងទិញរថយន្ដមួយគ្រឿងតម្លៃ700.000 យាន់(101.000 USD)ដើម្បីកាដូឱ្យមិត្ដស្រី។
បុរសត្រកូលថាង ប្រាប់បងប្អូនទាំង៣នាក់ឱ្យនៅហាងនេះចាំខ្លួនដើម្បីគាត់ទៅដកលុយ។បន្ទាប់មកថាងបានរត់ទៅកាន់ផ្សារ ទំនើបក្បែរនោះ រួចទិញកាំបិតចិតផ្លែឈើតម្លៃ១៥យាន់ ហើយដើរចេញរកកន្លែងស្ងាត់ ហើយចាប់ផ្ដើមអារលើដៃទាំងសងខាងរបស់ខ្លួន។ រួចរាល់ហើយក៏ទូរស័ព្ទប្រាប់មិត្ដស្រីថា ខ្លួនបានត្រូវពួកចោរប្លន់ប្រើកាំបិតវាយប្រហារប្លន់យកអស់750.000 យាន់(109 .000USD)និងសង្ឃឹមថាអាចរួចខ្លួនពីការសន្យាទិញរថយន្ដឱ្យនាង។ប៉ុន្ដែនាងយ៉ាង បានទូរស័ព្ទប្រាប់ប៉ូលិសក្នុងពេលដែលបងប្រុសរបស់នាងនាំបុរសត្រកូលថាងទៅកាន់មន្ទីរពេទ្យ។
ពេលត្រូវបានប៉ូលិសសួរចម្លើយ ត្រកូលថាងបង្ខំចិត្ដសារភាពថាខ្លួនតាក់តែងរឿងនេះឡើងព្រោះតែបានជ្រុលកុហកមិត្តស្រី ថាខ្លួនជាអ្នកមានម្នាក់។
ត្រកូលថាងត្រូវបានប៉ូលិសឃុំខ្លួន១០ថ្ងៃនិងបង់ប្រាក់ពិន័យ៥០០យាន់។ប៉ុន្ដែរឿងដែលសំខាន់នោះគេនៅពុំទាន់ដឹងថា អំនួតល្បួងស្នេហ៍របស់ត្រកូលថាងវានឹងក្លាយទៅជាអ្វីនោះទេ៕
សូយន
