ព្រះវិហារ ៖ កងកម្លាំងមូលដ្ឋានអាវុធហត្ថ និងនគរបាលស្រុកជាំក្សាន្ត បានបើកប្រតិបត្តិការ បង្ក្រាបករណីរក្សាទុកចែកចាយនូវសារធាតុញៀនបានឃាត់ខ្លួនជនសង្ស័យចំនួន២នាក់ នៅរសៀល ថ្ងៃទី២៣ សីហា ២០១៨ នៅចំណុចភូមិគោកស្រឡៅ ឃុំជាំក្សាន្ត ស្រុកជាំក្សាន្ត ខេត្តព្រះវិហារ ។
សមត្ថកិច្ចមូលដ្ឋាន បានឲ្យដឹងថា ប្រតិបត្តិការនេះធ្វើឡើងដោយ មូលដ្ឋានអាវុធហត្ថស្រុកជាំក្សាន្ត ខេត្តព្រះវិហារ ចំនួន៦នាក់ សហការជាមួយកម្លាំងអធិការដ្ឋាននគរបាលស្រុកជាំក្សាន្ត ចំនួន៧នាក់ បានចុះបង្ក្រាបករណីរក្សាទុក ចែកចាយ នូវសារធាតុញៀនបានឃាត់ខ្លួនជនសង្ស័យ ចំនួន២នាក់ និងដកហូតម្សៅក្រាមពណ៌សថ្លា (ម៉ាទឹកកក) ចំនួន៤កញ្ចប់តូច ទំងន់០,៦៦ក្រាម ជញ្ជីងថ្លឹងគ្រឿងញៀន១ និងម៉ូតូចំនួន១គ្រឿង ។
កម្លាំងជំនាញ កំពុងកសាងសំណុំរឿង ដើម្បីបញ្ជូន ជនសង្ស័យ និងវត្ថុតាង ទៅអាវុធហត្ថខេត្តព្រះវិហារ ដើម្បីចាត់ការបន្តតាមនីតិវិធី៕ ដោយ៖បញ្ញាស័ក្តិ
