ជារៀងរាល់យប់ មានក្មេងស្រីម្នាក់តែងតែមកស្ថានីយរថភ្លើង Orai ដោយមនុស្សភាគច្រើនបានសន្និដ្ឋានថា នាងមកដើម្បីសុំលុយអ្នកដំណើរ ប៉ុន្តែការពិត នាងមកទីនោះរាល់យប់ មិនដែលខាន ដើម្បីរៀន និងធ្វើកិច្ចការសាលារបស់នាងសោះ ដោយសារតែផ្ទះរបស់នាងពុំមានអគ្គិសនី។
ស្ថិតក្នុងសំលៀកបំពាក់ចាស់ និងគ្មានស្បែកជើងពាក់នឹងគេ ក្មេងស្រីក្រីក្រម្នាក់នេះ កំពុងតែរៀននៅមុខកន្លែងគិតលុយ នៃស្ថាននីយ៍រថភ្លើងក្នុងរដ្ឋ Uttar Pradesh ដែលជារដ្ឋមានប្រជាជនក្រីក្រមួយក្នុងប្រទេសឥណ្ឌា។
ក្មេងស្រីរូបនោះមានឈ្មោះថា Divya ហើយរូបថតរបស់នាងដែលកំពុងសិស្សានៅមុខស្ថានីយ៍រថភ្លើងត្រូវបានថតដោយអ្នកដំណើរម្នាក់ឈ្មោះ Rajesh Kumar Singh។
អ្នកដំណើរម្នាក់នោះមានការភ្ញាក់ផ្អើលយ៉ាងខ្លាំង ដោយសារឃើញក្មេងក្រីនោះរៀនដោយខ្លួនឯងនៅមុខស្ថានីយ៍រថភ្លើង ហើយនាងហាក់មិនអើពើចំពោះនរណាទាំងអស់ ដែលបានដើរកាត់នាង អ្វីដែលនាងផ្តោតចិត្តទុកដាក់នោះគឺលើការស្វ័យសិក្សារបស់នាង។
សូមបញ្ជាក់ថា ឥណ្ឌាជាប្រទេសដែលមានប្រជាជនច្រើនបំផុតចំណាត់ថ្នាក់ទី ២បន្ទាប់ពីចិន។ ក្នុងចំណោមប្រជាជនសរុប ១,១ ពាន់លាននាក់ មានប្រជាជន ២៤០លាននាក់ដែលមិនមានអគ្គិសនីប្រើប្រាស់ក្នុងផ្ទះពួកគេ ដោយសារតែពួកគេមិនមានលទ្ធភាព៕ សុភ័ក្ត្រ
ប្រភព៖ Good Times