ស្ត្រីមានផ្ទៃពោះម្នាក់ដែលទើបបាន ៣២ សប្តាហ៍ បានកំពុងធ្វើដំណើរនៅលើជើងហោះហើររបស់ក្រុមហ៊ុនអាកាសចរណ៍ China Airlines ដែលចេញដំណើរពីតៃប៉ិ ឆ្ពោះទៅកាន់ទីក្រុង Los Angeles ។ ប៉ុន្តែ ខណៈយន្តហោះកំពុងដើរទើបតែបាន ៦ ម៉ោង ចេញពីតៃប៉ិ ស្រាប់តែនាងឈឺចុកពោះខ្លាំងតែម្តង ។
ស្ត្រីតៃវ៉ាន់នោះ បានប្រាប់ទៅក្រុមអាកាសយានិកថា ទឹកភ្លោះរបស់នាងបានបែកហើយ នៅពេលដែលយន្តកំពុងធ្វើដំណើរ ដែលនៅសល់ ១៣ ម៉ោង ទៀតពីគោលដៅរបស់វា ខណៈស្ថិតក្នុងរយៈកម្ពស់ ៩ គីឡូម៉ែត្រ ។
ក្រុមអាកាសយានិកដែលមានការភ័យស្លន់ស្លោ បានស្នើសុំការអនុញ្ញាតសង្គ្រោះបន្ទាន់ភ្លាមៗ ដើម្បីចុះចតនៅព្រលានយន្តហោះជិតនោះបំផុត ប៉ុន្តែ ភ្លាមៗនោះ បានដឹងថា វាយឺតពេលទៅហើយ ។
ពួកគេបានស្រែករកជំនួយពីគ្រូពេទ្យ ហើយសំណាងល្អណាស់ ដែលពួកគេរកឃើញគ្រូពេទ្យម្នាក់នៅលើយន្តហោះរបស់ពួកគេ ។
លោកគ្រូពេទ្យម្នាក់បានគ្រប់គ្រងសម្រាលកូនឲ្យអ្នកដំណើរនោះដោយសុវត្ថិភាព នៅចំពោះមុខអ្នកដំណើរដទៃទៀត និងក្រុមអាកាសយានិកដែលមានការព្រួយបារម្ភយ៉ាងខ្លាំង ។
នៅក្នុងវីដេអូចែករំលែកយ៉ាងផុសផុល ក្រុមនារីអ្នកបម្រើលើយន្តហោះ ត្រូវបានឃើញលើកបីទារក ខណៈសម្លេងស្រែកហ៊ោ និងទះដៃសាទរ ត្រូវបានលឺពីខាងក្រោយ ។
សមាជិកអាកាសយានិកដទៃទៀត បាននាំយកក្រដាសអនាម័យ និងកន្សែង មកជូតទារកនោះ ហើយបន្ទាប់មក ពួកគេត្រូវបានឃើញយកភួយធំៗ មកគ្របដណ្តប់ទារកស្រី និងម្តាយ ។
អ្នកដំណើរម្នាក់ដែលបានថតហេតុការណ៍ដ៏គួរឲ្យចាប់អារម្មណ៍នេះ បាននិយាយថា៖ «នេះគឺជាខណៈពេលនៅក្នុងដំណើររឿងរ៉ាវជីវិតមួយ ។ ហើយសង្ឃឹមថា អ្នកទេសចរទាំងនេះនឹងពុំជួបប្រទះនឹងរឿងនេះម្តងទៀត» ។
ទាំងម្តាយ និងទារក ត្រូវបានបញ្ជូនទៅកាន់មន្ទីរពេទ្យ បន្ទាប់ពីយន្តហោះបានធ្វើការចុះចតនៅព្រលានយន្ត Ted Stevens Anchorage នៅក្នុង Alaska ។
រដ្ឋបាលអាកាសចរណ៍ស៊ីវិលនិយាយថា ទារកស្រីនេះកើតនៅក្នុងដែនអាកាសអាមេរិក នៅលើជើងយន្តហោះចិន ។
ពួកគេបានបន្ថែមថា សញ្ជាតិរបស់នាង នឹងអាស្រ័យទៅលើសំបុត្រកំណើត ដែលត្រូវបានចេញដោយមន្ទីរពេទ្យ Anchorage ៕ ចន្ទី (express.co.uk)