ភ្នំពេញ ៖ អភិបាលរាជធានី បានបញ្ជាទៅអាជ្ញាធរនិងសមត្ថកិច្ចទាំងអស់ រួមគ្នាបំបែកសំណុំរឿង ប្លន់ប្រដាប់អាវុធ ទៅលើធនាគារ អ អេច ប៊ី ឥណ្ឌូឆៃណា នៅក្នុងខណ្ឌចំការមន ដើម្បីចាប់បញ្ជូនជនសង្ស័យ មកដាក់ទោសទៅតាមច្បាប់ ដើម្បីបង្កើនជំជឿទុកចិត្តពីប្រជាពលរដ្ឋ មកលើសមត្ថកិច្ច។
អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ លោក ឃួង ស្រេង កាលពីព្រឹកថ្ងៃទី២៤ ខែសីហា ឆ្នាំ២០១៨នេះ បានកោះអញ្ជើញអាជ្ញាធរទាំង១២ខណ្ឌ និងសមត្ថកិច្ចទាំង២ប្រភេទ ចំណុះឲ្យគណៈបញ្ជាការឯកភាពរាជធានីភ្នំពេញ មកប្រជុំជាបន្ទាន់ ដើម្បីរិះរកគ្រប់វិធីនិងយុទ្ធសាស្ត្រ ឈានទៅដល់ការបង្ក្រាបបទល្មើស ពិសេសអំពើប្លន់ប្រដាប់អាវុធ ទៅលើធនាគារមួយកន្លែង នៅក្នុងខណ្ឌចំការមន ទាំងកណ្ដាលថ្ងៃត្រង់ កាលពីថ្ងៃទី២៣ សីហានេះ។
ក្នុងកិច្ចប្រជុំបន្ទាន់នោះ មានការចូលរួមពី នាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ មេបញ្ជាការរងកងរាជអាវុធហត្ថរាជធានី និងអភិបាលខណ្ឌទាំង១២។
លោក ឃួង ស្រេង បានលើកឡើងថា តាមបណ្តាខណ្ឌត្រូវមានអ្នកប្រចាំបញ្ជា ក្នុងគោលដៅចេញអន្តរាគមន៍ភ្លាមៗ នៅពេលមានកើតហេតុការណ៍ ណាមួយកើតឡើងជាយថាហេតុ ។ សមត្ថកិច្ចទាំងអស់មិនត្រូវបន្ទោសគ្នាទៅវិញមក ដាក់បន្ទុកលើកស្ថាប័នណាមួយនោះទេ គឺត្រូវរួមសហការគ្នា ការពារសន្តិសុខសុវត្ថិភាពជូនប្រជាពលរដ្ឋ អាជីវករ ដែលប្រកបអាជីវកម្ម ក្នុងរាជធានីភ្នំពេញ ព្រោះនេះជាកាតព្វកិច្ចរបស់យើងទាំងអស់គ្នា ក្នុងនាមជាកងកម្លាំងមានសមត្ថកិច្ច។
លោក ឃួង ស្រេង ក្នុងកិច្ចប្រជុំបន្ទាន់នោះ ក៏បានបញ្ជាទៅអាជ្ញាធរនិងសមត្ថកិច្ចទាំងអស់ ត្រូវសហការគ្នាឲ្យបានល្អ ដាក់គោលដៅយាមប្រចាំការ២៤ម៉ោងលើ២៤ម៉ោង បង្ក្រាបបទល្មើសគ្រឿងញៀន ពិសេសគឺការរួមគ្នាបំបែកសំណុំរឿង ប្លន់ប្រដាប់អាវុធ ទៅលើធនាគារមួយកន្លែង នៅក្នុងខណ្ឌចំការមនទាំងកណ្ដាលថ្ងៃត្រង់ កាលពីថ្ងៃទី២៣ សីហានេះ ដើម្បីចាប់បញ្ជូនជនសង្ស័យមកដាក់ទោសទៅតាមច្បាប់ បង្កើនជំជឿទុកចិត្តពីប្រជាពលរដ្ឋមកលើសមត្ថកិច្ចរបស់យើង។
គួររំលឹកថា កាលពីថ្ងៃទី២៣ ខែសីហាម្សិលមិញនេះ មានចោរប្រដាប់អាវុធមួយក្រុមមានគ្នាប្រមាណ៥នាក់ បានចូលប្លន់ធនាគារមួយទាំងកណ្ដាលថ្ងៃត្រង់ ស្ថិតនៅតាមបណ្ដោយផ្លូវម៉ៅសេទុង ខណ្ឌចំការមន ដោយយកអស់ទឹកប្រាក់ប្រមាណ១៨ម៉ឺនដុល្លារ។ ខណៈពេលនេះ កម្លាំងសមត្ថកិច្ចជំនាញ បាននិងកំពុងសហការគ្នាស្រាវជ្រាវយ៉ាងយកចិត្ដទុកដាក់បំផុត ដើម្បីតាមចាប់ខ្លួនជនសង្ស័យមកផ្ដន្ទាទោសតាមច្បាប់៕ ដោយ ៖ កូឡាប