អ្វីដែលយើងធ្វើ និងរបបអាហារមួយចំនួនដែលយើងទទួលទានរាល់ថ្ងៃ អាចបណ្តាលឲ្យកើតជំងឺ មហារីកបាន ហើយប្រសិនជាអ្នកគិតថា អាហារដែលអ្នកទទួលទាន មិនផ្តល់សុខភាពល្អ អ្នកគួរផ្លាស់ប្តូរទម្លាប់បរិភោគទាំងនោះ។
ទន្ទឹមនឹងអាហារមួយចំនួនបណ្តាលឲ្យកើតមហារីក ក៏មានអាហារមួយចំនួនផងដែរជួយការពារ អ្នកពីជំងឺដ៏សាហាវនេះ។
ខាងក្រោមនេះ ជាអាហារ ៦ប្រភេទដែលវាមិនត្រឹមតែមានរសជាតិឆ្ងាញ់ទេ តែថែមទាំងសម្បូរទៅដោយជីវជាតិសំខាន់ៗដើម្បីជំរុញដល់សុខភាពល្អ ហើយសម្លាប់កោសិកាមហារីកបានទៀតផង៖
១. ស្រាក្រហម
ស្រាក្រហមសម្បូរទៅដោយសារធាតុ Resveratol ដែលជាអង់ទីអុកស៊ីដង់ដ៏ខ្លាំក្លាមួយដែលមានក្នុងសម្បកផ្លែទំពាំងបាយជូរ ហើយអាចជួយបន្ថយភាពចាស់ និងបញ្ហាសុខភាពផ្សេងៗទៀត។ វាអាចកំចាត់រ៉ាឌីកាលសេរី វីរុស បន្ថយការខូចខាតរបស់កោសិកា និងជួសជុល DNA បានថែមទៀតផង។
២. ប៉េងប៉ោះ
ជំងឺមហារីកក្រពេញប្រូស្តាតអាចកាត់បន្ថយបានរហូតដល់ ៥០ភាគរយ បើសិនជាអ្នកញ៉ាំប៉េងប៉ោះចម្អិនរួចជាទៀងទាត់។ ការស្រាវជ្រាវបានបង្ហាញថា ប៉េងប៉ោះមានសារធាតុ Lycopene ខ្ពស់ ដែលអាចបន្ថយការភ្ញោចដល់សកម្មភាពរបស់កោសិកាមហារីក។
៣. ផ្លែបឺរីពណ៌ខៀវ និងរ៉ាសបឺរី
ផ្លែឈើពីរប្រភេទនេះត្រូវបានគេស្គាល់ថាមានសមត្ថភាពប្រឆាំងនឹងមហារីក ជាពិសេសល្អចំពោះស្ត្រីតែម្តងក្នុងការបន្ថយការប្រឈមនឹងជំងឺមហារីកក្រពេញអូវ៉ែតែម្តង។ សារធាតុ Phytochemicals ដែលវាមាននាទីធ្វើឲ្យផ្លែឈើទាំងពីរនេះមានពណ៌ចាស់ ក៏អាចបន្ថយឥទ្ធិពលសកម្មភាពរបស់កោសិកាមហារីកបានដែរ។
៤. សូកូឡាខ្មៅ
សូកូឡាខ្មៅគឺជាបង្អែមផ្តល់សុខភាពដ៏អស្ចារ្យ ដោយសារតែវាមានអង់ទីអុកស៊ីដង់ច្រើន។ អាហារមួយនេះល្អណាស់សម្រាប់សុខភាពបេះដូង ជួយឲ្យមានអារម្មណ៍ល្អ និងប្រឆាំងកោសិកាមហារីកទៀត។
៥. កាហ្វេ និងតែបៃតង
ភេសជ្ជៈក្តៅៗទាំងពីរនេះប្រហែលជាជម្រើសដំបូងគេសម្រាប់ការងារនៅពេលព្រឹក ហើយអង់ទីអុកស៊ីដង់ដែលមានក្នុងភេសជ្ជៈទាំងពីរនេះក៏អាចបន្ថយឱកាសកើតជំងឺមហារីកបានដែរ។
៦. រមៀត
គ្រឿងផ្សំធ្វើម្ហូបពណ៌លឿងមួយនេះល្អបំផុតសម្រាប់សុខភាព។ វាអាចប្រឆាំងនឹងជំងឺមហារីក ភាពចាស់ ការរលាក ការឈឺចាប់ ការខូចខាតរបស់កោសិកា បង្កើនមុខងារប្រព័ន្ធភាពស៊ាំ ការចងចាំ និងព្យាបាលជំងឺផ្តាសាយ៕ សុភ័ក្ត្រ
ប្រភព៖ flashsante
