ហ្សាការតា ៖ កីឡាការិនីខ្មែរកាត់អាមេរិក ខាន់ ចេសា បន្ទាប់ពីយកឈ្នះថៃ ចិន អ៊ីរ៉ង់ និងហ្វីលីពីន បានឡើងទៅវគ្គផ្តាច់ព្រាត់ ដោយបំបាក់កីឡាការិនី អារ៉ាប់រួម (UAE) Mahra ក្នុងលទ្ធផលពិន្ទុ ឈ្នះដាច់ ១០០-០។ ក្នុងការប្រកួតចំនួន៥លើក ខាន់ ចេសា បានផ្តួលគូរប្រកួត ក្នុងលទ្ធផល ឈ្នះដាច់ ១០០-០ ។
កីឡាការិនីកូនកាត់ខ្មែរ-អាមេរិក ខាន់ ចេសា បានយកឈ្នះលើកីឡាការិនីអារ៉ាប់រួម Alhinaai Mahra ក្នុងវគ្គផ្ដាច់ព្រ័ត្រ ប្រភេទកីឡាជឺជិតស៊ូ លើវិញ្ញាសាទម្ងន់ក្រោម៤៩គីឡូក្រាម នៅទីក្រុងហ្សាការតា ដែលធ្វើឲ្យកម្ពុជាដណ្ដើមបានមេដាយមាសលើកដំបូង នៅក្នុងព្រឹត្តិការណ៍កីឡាអាស៊ី Asian Games លើកទី១៨ នៅប្រទេសឥណ្ឌូណេស៊ី។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្ម បានឲ្យដឹងពីប្រទេសឥណ្ឌូណេស៊ីថា នេះគឺជាមោទនភាពថ្មីមួយទៀត សម្រាប់គ្រួសារកីឡាជាតិកម្ពុជា ដែលដណ្ដើមបានមេដាយមាស នៅក្នុងព្រឹត្តិការណ៍កីឡាប្រចាំទ្វីបអាស៊ី ៤ឆ្នាំម្ដងនេះ។ នេះជាមេដាយមាសទី២ ក្នុងប្រវត្តិសាស្ដ្រ បន្ទាប់ពីវីរកីឡាការិនី ស៊ន សៀវម៉ី ដែលដណ្ដើមបានមេដាយមាសលើកដំបូង ក្នុងការប្រកួតកីឡា Asian Games លើកទី១៧ នៅសាធារណរដ្ឋកូរ៉េខាងត្បូង កាលពីឆ្នាំ២០១៤។ ប៉ុន្តែលើកនេះ សៀវម៉ី បានធ្លាក់ហើយ។
កីឡាការិនី ខាន់ ចេសា បានឆ្លងកាត់ការប្រកួត ៦លើក ក្នុងនោះប្រកួតទី១ ឈ្នះកីឡាការិនីថៃ ១០០-០ពិន្ទុ។ ប្រកួតទី២ ឈ្នះកីឡាការិនីចិន ដោយស្វ័យប្រវត្តិ បន្ទាប់ពីកីឡាការិនីចិន បោះបង់ការប្រកួត។ ប្រកួតទី៣ ឈ្នះពិន្ទុដាច់លើកីឡាការិនីអីរ៉ង់។ ប្រកួតទី៤ ឈ្នះកីឡាការិនីហ្វីលីពីន ក្នុងវគ្គពាក់កណ្ដាលផ្ដាច់ព្រ័ត្រក្នុងពិន្ទុ ១០០-០ និងចុងក្រោយផ្ដួលកីឡាការិនី អារ៉ាប់រួម ក្នុងពិន្ទុ ១០០-០ ដោយដណ្ដើមបានមេដាយមាស៕ ដោយ ៖ បញ្ញាស័ក្តិ
