បុរសម្នាក់បានបាញ់ប្រហារទៅលើមន្ត្រីប៉ូលិសពីរនាក់ នៅក្បែរអគារក្រសួងការបរទេសរុស្ស៊ី ហើយបើគិតពីចម្ងាយគឺឆ្ងាយពីស្ថានឯកអគ្គរាជទូតព្រះរាជាណាចក្រកម្ពុជា ប្រចាំប្រទេសរុស្ស៊ី ប្រមាណ ៥គីឡូម៉ែត្រ នៅកណ្តាលទីក្រុងមូស្គូ ។ អ្នកបាញ់ប្រហារនេះត្រូវបានរងរបួសយ៉ាងធ្ងន់ធ្ងរដោយការបាញ់ត្រឡប់មកវិញរបស់មន្ត្រីប៉ូលិស ហើយត្រូវបានគេរាយការណ៍ថាបានស្លាប់នៅក្នុងមន្ទីរពេទ្យ។
អ្នកស្រី Yulia Ivanova អ្នកនាំពាក្យគណៈកម្មការស៊ើបអង្កេតរបស់រុស្ស៊ីបានប្រាប់ទីភ្នាក់ងារ Interfax ថា ៖ បុរសម្នាក់ដែលកំពុងដើរតាមបណ្តោយផ្លូវ Sivtsev Vrazhek Lane នៅទីក្រុងមូស្គូ បានបាញ់ប្រហារទៅលើប៉ូលិស ដោយគ្មានហេតុផលច្បាស់លាស់ ខណៈដែលពួកគេកំពុងឆ្លងកាត់។
អ្នកស្រី Ivanova បាននិយាយថា មន្ត្រីប៉ូលិសទាំងពីរបានប្រើកាំភ្លើងបាញ់ទៅលើជនល្មើសវិញ ហើយបានធ្វើឱ្យជនល្មើសរងរបួសធ្ងន់។ លោកបានបន្ថែមថា បុរសនោះត្រូវបានដកហូតអាវុធនិងបញ្ជូនទៅមន្ទីរពេទ្យ។
អ្នកស្រីបានបន្ថែមថា ករណីនេះកំពុងត្រូវបានស៊ើបអង្កេត។
រូបថតពីកន្លែងកើតហេតុដែលបានបង្ហោះនៅលើប្រព័ន្ធផ្សព្វផ្សាយសង្គមក៏បានបង្ហាញកាំភ្លើងមួយដែលស្រដៀងទៅនឹងកាំភ្លើងខ្លីស្វ័យប្រវត្តិដែលផលិតដោយសូវៀតនៅលើដី។
ប៉ូលិសមូស្គូបាននិយាយថា ការវាយប្រហារនេះបានកើតឡើងនៅម៉ោង 20និង00 (ម៉ោងក្នុងស្រុក)ហើយជនល្មើសតម្រង់គោលដៅទៅលើមន្ត្រីប៉ូលិសដែលយាមកាមនៅក្នុងតំបន់នេះ។
RIA Novosti បានរាយការណ៍ថា មន្ត្រីប៉ូលីសដែលរងរបួសបានបានរួចផុតពីគ្រោះថ្នាក់ដល់ជីវិត។
ប្រភពព័ត៌មានមួយបានប្រាប់ TASS ថា អ្នកវាយប្រហារបានស្លាប់នៅក្នុងមន្ទីរពេទ្យដោយសារតែគ្រាប់កាំភ្លើងបានបាញ់ចំក្បាល។ បុរសម្នាក់នេះ ត្រូវបានគេស្គាល់ថាមានអាយុ 31 ឆ្នាំ រស់នៅរដ្ឋ Kabardino-Balkaria នៅក្នុងតំបន់ Caucasus ខាងជើងរបស់រុស្ស៊ី ៕ សូយន
