ខេត្តព្រះសីហនុ៖ កម្លាំងនគរបាលព្រហ្មទណ្ឌ ខេត្តព្រះសីហនុ បានចាប់ខ្លួនជនជាតិចំនួនចិន ៣នាក់ ពាក់ព័ន្ធករណីបង្ខាំងមនុស្ស (ជនជាតិចិនដូចគ្នា) ធ្វើទារុណកម្ម ដើម្បីបង្ខំជំរិតទារប្រាក់ចំនួន ៤០០០ដុល្លារសហរដ្ឋអាមេរិក នៅក្នុងក្រុងព្រះសីហនុ។របាយការណ៍ពីនគរបាលឲ្យដឹងថា កាលពីថ្ងៃទី២៣ ខែសីហា ឆ្នាំ២០១៨ វេលាម៉ោង ២៣ និង៣០នាទី កម្លាំងជំនាញ បានទទួលបណ្តឹងតាមទូរស័ព្ទថា មានជនជាតិចិនម្នាក់ ត្រូវបានជនជាតិចិនដូចគ្នា ចាប់ឃុំឃាំង ធ្វើទារុណកម្ម នៅក្នុងបន្ទប់មួយ ស្ថិតនៅក្នុងក្រុងព្រះសីហនុ។
សមត្ថកិច្ចបន្តថា បន្ទាប់ពីទទួលបណ្តឹងតាមទូរស័ព្ទ កម្លាំងជំនាញផែននគរបាលព្រហ្មទណ្ឌ បានធ្វើការស្រាវជ្រាវយ៉ាងយកចិត្តទុកដាក់ រហូតដល់ថ្ងៃទី២៤ ខែសីហា ឆ្នាំ២០១៨ វេលាម៉ោង១៥ និង៣០នាទី ទើបបង្ក្រាបជនសង្ស័យ ៣នាក់ និងរំដោះជនរងគ្រោះ នៅក្នុងបន្ទប់លេខ២០៥ នៃសណ្ឋាគារ ហ្វូវជីង ស្ថិតនៅក្រុមទី៧ ភូមិ២ សង្កាត់២ ក្រុងព្រះសីហុន ខេត្តព្រះសីហនុ។ ជនរងគ្រោះមានឈ្មោះ YANG JIE ភេទប្រុស អាយុ៣២ឆ្នាំ ជនជាតិចិន។
ចំណែក ជនសង្ស័យមានចំនួន ០៣នាក់ រួមមាន៖ ១-ឈ្មោះ WANG LE PIN ភេទប្រុស អាយុ៣១ឆ្នាំ- ២-ឈ្មោះ LU MING JIAN ភេទប្រុស អាយុ៣២ឆ្នាំ និង ៣-ឈ្មោះ XIAO SONG ភេទប្រុស អាយុ២៨ឆ្នាំ។
ជនសង្ស័យទាំង៣ ជាជនជាតិចិន មានមុខរបរ ចងការប្រាក់ក្នុងកាស៊ីណូ ស្នាក់នៅ ក្រុមទី៧ ភូមិ២ សង្កាត់២ ក្រុងសីហនុ ដូចគ្នា។
សមត្ថកិច្ចឲ្យដឹងទៀតថា ករណីនេះកើតឡើងដោយសារ ជនរងគ្រោះបានចងការប្រាក់ពីក្រុមជនសង្ស័យ ជាកាក់ចំនួន ៤០០០ដុល្លារ ដើម្បីលេងល្បែងក្នុងកាស៊ីណូ។
សមត្ថកិច្ចឲ្យដឹងបន្តថា ពេលលេងចាញ់អស់លុយហើយគ្មានលុយសង ក៏ត្រូវជនសង្ស័យចាប់ឃុំក្នុងបន្ទប់ ដើម្បីឲ្យជនរងគ្រោះទាក់ទងទៅក្រុមគ្រួសារ បងប្អូន ឬមិត្តភក្តិរកលុយ មកសងពួកគេទើបពួកគេដោះលែងវិញ។
បច្ចុប្បន្ននេះ ជនសង្ស័យទាំង៣ ត្រូវកម្លាំងជំនាញនគរបាលព្រហ្មទណ្ឌ នៃស្នងការដ្ឋាននគរបាលខេត្តព្រះសីហនុ កំពុងបន្តនីតិវិធីនៅការិយាល័យនគរបាលព្រហ្មទណ្ឌកម្រិតស្រាល៕ ដោយ៖ ដែន សីមា