ក្រសួងការបរទេសថៃបានព្រមានថា កូរ៉េខាងត្បូងនឹងអនុវត្តន៍ទិដ្ឋាការទេសចរណ៍ឡើងវិញចំពោះអ្នកកាន់លិខិតឆ្លងដែនថៃដោយហេតុថាពលរដ្ឋនៅប្រទេសនេះទៅធ្វើជាទេសចរណ៍នៅកូរ៉េខាងត្បូង រួចគេចខ្លួនធ្វើការនៅប្រទេសនេះ។
អ្នកស្រីBusadee Santipitak អ្នកនាំពាក្យក្រសួងការបរទេសថៃឱ្យដឹងថា ក្រសួងការបរទេសកូរ៉េខាងត្បូងមានការបារម្ភអំពីចំនួនភ្ញៀវទេសចរមកពីថៃ ធ្វើការខុសច្បាប់នៅប្រទេសនេះកំពុងកើនឡើជាហេតុធ្វើឱ្យក្រុងសេអ៊ូលត្រូវពិនិត្យឡើងវិញអំពីកិច្ចព្រមព្រៀងលើកលែងទិដ្ឋាការ។
អ្នកនាំពាក្យរូបនេះបានពោលប្រាប់កាសែត Khaosod ថា៖«បច្ចុប្នន្ននេះយើងខ្ញុំពុំទាន់ទទួលបានសេចក្ដីប្រកាសផ្លូវការពីភាគី កូរ៉េខាងត្បូង។ហេតុនេះកិច្ចព្រមព្រៀងដែលមានពីមុននៅបន្ដ ។ប៉ុន្ដែចំពោះការលើកលែងទិដ្ឋាការទេសចរណ៍ដល់ពលរដ្ឋថៃអាចត្រូវលុបចោល»។ មុននេះភ្ញៀវទេសចរថៃ អាចត្រូវបានអនុញ្ញាតឱ្យស្នាក់នៅកូរ៉េខាងត្បូងរយៈពេល៩០ថ្ងៃដោយពុំចាំបាច់ធ្វើទិដ្ឋាការ។
តាមក្រសួងការបរទេសថៃ ពលរដ្ឋថៃរាប់សែននាក់កំពុងធ្វើការខុសច្បាប់នៅប្រទេសកូរ៉េខាងត្បូង ហើយសំខាន់ពួកគេចូល ទៅកាន់ប្រទេសនោះតាមរយៈច្រកទេសចរណ៍។ក្រសួងការបរទេសថៃមានការព្រួយបារម្ភថាអ្នកទាំងនោះអាចប្រឈមនឹងការត្រូវចាប់ខ្លួន គំរាមកំហែងដល់អាយុជីវិត ព្រោះពុំមានរបបធានារ៉ាប់រងនិងសន្ដិសុខ ពិសេសពួកគេអាចក្លាយជាជនរងគ្រោះនៃបណ្ដាបណ្ដាញឧក្រិដ្ឋជន។
ពេលនេះស្ថាប័នអន្ដោប្រវេសន៍កូរ៉េខាងត្បូងកំពុងបង្កើនវិធានការរឹតបន្ដឹងភ្ញៀវទេសចរមកពីថៃមុនពេលធ្វើការសម្រេចចិត្ដលុបចោលរបបលើកលែងទិដ្ឋាការរហូតដល់ពេលដែលសភាពការណ៍លួចគេចខ្លួនពួនសម្ងំធ្វើការមិន
ស្របច្បាប់ត្រូវបានត្រួតពិនិត្យនិងគ្រប់គ្រង-នេះបើតាមក្រសួងការបរទេសថៃ៕
សូយន