កណ្តាល៖ នគរបាលស្រុកស្អាងបានឲ្យដឹងថា មានក្រុមជនសង្ស័យ ចំនួន៣នាក់ ក្នុងចំណោមបក្ខពួក៥នាក់ បាននាំគ្នាទិញគ្រឿងញៀនជក់ រួចបានបបួលគ្នាទៅចូលលួចកាបូបដាក់លុយ និងសម្ភាររបស់ជនរងគ្រោះ ហើយត្រូវសមត្ថកិច្ចជំនាញក្របួចបាន។ ករណីអំពើលួចនេះ កើតហេតុថ្ងៃទី ២៥សីហា២០១៨ វេលាម៉ោង ២និង១០នាទី នៅចំណុចភូមិកណ្ដាល ឃុំក្រាំងយ៉ូវ ស្រុកស្អាង ខេត្តកណ្ដាល ។
នគរបាលមូលដ្ឋាន ឲ្យដឹងថា ជនរងគ្រោះឈ្មោះ សាន សុខលី ភេទស្រី អាយុ ៤៧ ឆ្នាំ ជនជាតិខ្មែរ មុខរបរកសិករ មានទីលំនៅភូមិកណ្ដាល ឃុំក្រាំងយ៉ូវ ស្រុកស្អាង ។ ជនសង្ស័យចំនួន៥ នាក់៖១. ឈ្មោះចាន់ថន សុខនី ភេទប្រុស អាយុ ២១ ឆ្នាំជជាតិខ្មែរ មុខរបរមិនពិតប្រាកដ មានទីលំនៅភូមិធំ ឃុំក្រាំងយ៉ូវ ស្រុកស្អាង ខេត្តកណ្ដាល(គេចខ្លួន) ២. ឈ្មោះប្រុស ហុក ភេទប្រុស អាយុ ២១ ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិ អំពិល ឃុំក្រាំងយ៉ូវ ស្រុកស្អាង ខេត្តកណ្ដាល(គេចខ្លួន) ៣. ឈ្មោះ ហ៊ាង ហុង ភេទប្រុស អាយុ ១៦ ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិអំពិល ឃុំក្រាំងយ៉ូវ ស្រុកស្អាង ខេត្តកណ្តាល (ឃាត់ខ្លួន) ៤. ឈ្មោះ វ៉ាត វណ្ណឌី ភេទប្រុស អាយុ ១៨ ឆ្នាំ ជនជាតិខ្មែរ មុខរបរកសិករ មានទីលំនៅភូមិអំពិល ឃុំក្រាំងយ៉ូវ ស្រុកស្អាង ខេត្តកណ្តាល (ឃាត់ខ្លួន) និង៥. ឈ្មោះ ឆន ថេន ភេទប្រុស អាយុ ២៣ ឆ្នាំ ជនជាតិខ្មែរ មុខរបរកសិករមានទីលំនៅភូមិអំពិល ឃុំក្រាំងយ៉ូវ ស្រុកស្អាង ខេត្តកណ្ដាល(ឃាត់ខ្លួន)។ សម្ភារបាត់បង់រួមមានៈ ប្រាក់ដុល្លារ ចំនួន ១.៣០០ដុល្លារ , ខ្សែក ខ្សែដៃ ចិញ្ចៀនមាស សរុប១ដំឡឹង២ជី ប្រាក់រៀល ចំនួន៥លានរៀល ទូរស័ព្ទដៃម៉ាកអាយហ្វូន5 ចំនួន ១គ្រឿង និងភេសជ្ជៈខារ៉ាបាវចំនួន ១កេះ (សរុបជាប្រាក់ជាង ៤០០០ដុល្លារ) ។
ប្រភពដដែល បានបញ្ជាក់ពីសភាពរឿងហេតុៈ នៅថ្ងៃទី២៥សីហា២០១៨ វេលាម៉ោង ២.១០នាទីទៀបភ្លឺ ក្រុមជនសង្ស័យខាងលើ បាននាំគ្នាទិញគ្រឿងញៀនជក់ រួចបានបបួលគ្នា ទៅចូលលួចកាបូបដាក់លុយ និងសម្ភារៈរបស់ជនរងគ្រោះ ដែលលក់ដូរ២៤ម៉ោង ។ ពេលនោះឈ្មោះវ៉ាត វណ្ណឌី ជាអ្នកមើលផ្លូវ ឈ្មោះ ចាន់ថន សុខនី ជាអ្នកចូលយកកាបូបដាក់លុយ ឈ្មោះ ហ៊ាង ហុង យកភេសជ្ជៈខារ៉ាបាវ មួយកេះ ។ ឈ្មោះ ប្រុស ហុក ឡើងលើផ្ទះយកបានទូរស័ព្ទដៃចំនួន ១គ្រឿង និងប្រាក់រៀលចំនួន ៧០.០០០រៀល ឯឈ្មោះ ឆន ថេន លួចបានមាន់ ២ ក្បាល ។ ពេលនោះជន រងគ្រោះភ្ញាក់ដឹងខ្លួន ក៏ស្រែកឆោឡោ ហើយក្រុមជនសង្ស័យបាននាំគ្នារត់គេចខ្លួនតែម្ដង ។ លុះព្រឹកឡើង ថ្ងៃដដែល ជនរងគ្រោះបានមកដាក់ពាក្យបណ្ដឹង នៅប៉ុស្តិ៍រដ្ឋបាលក្រាំងយ៉ូវ ។ បន្ទាប់មកកម្លាំងប៉ុស្តិ៍ បានកោះហៅឈ្មោះ ហ៊ាង ហុង ឈ្មោះ ឆន ថេន ឈ្មោះវ៉ាត វណ្ឌី មកសាកសួរ និឃាត់ខ្លួនតែម្តង ។ ចំណែកឈ្មោះ ប្រុស ហុក និងឈ្មោះចាន់ថន សុខនី (រត់គេចខ្លួន)ករណីនេះកម្លាំងជំនាញកំពុងកសាងសំណុំរឿងបន្ដនីតិវិធី ។
នគរបាលស្រុកស្អាង បានបញ្ជាក់ថា” ក្រុមជនសង្ស័យខាងលើ ជាមុខសញ្ញាលួចយ៉ាងសកម្ម នៅក្នុងមូលដ្ឋាន” ៕ដោយ៖កូឡាប
