បុរសម្នាក់បានបង្កការកកស្ទះចរាចរណ៍មួយសន្ទុះធំ នៅលើស្ពាន Gaozan ក្នុងទីក្រុង Foshan ខេត្ត Guangdong ប្រទេសចិន ដោយសារតែគាត់ស្រាប់តែបានចាប់ផ្តើមចម្អិនអាហារនៅកណ្តាលផ្លូវដ៏ចម្លែក ។
យោងតាមវីដេអូបង្ហោះនៅលើ Weibo, ហេតុការណ៍នេះបានកើតឡើងនៅវេលាម៉ោង ១១ ថ្ងៃត្រង់ ថ្ងៃទី២៣ ខែសីហា ឆ្នាំ២០១៨ ។ នៅខណៈពេលនោះ អ្នកបើកបរជាច្រើនបានស្រឡាំងកាំងយ៉ាងខ្លាំង នៅពេលបុរសម្នាក់ស្រាប់តែទាញធុងហ្គាស និងចម្អិនអាហារ ហើយបន្ទាប់មក បានរៀបចំអាហារប៊ូហ្វេរបស់គាត់យ៉ាងព្រងើយ ។
សកម្មភាពរបស់គាត់មើលទៅហាក់ដូចគាត់កំពុងចម្អិនគុយទាវមីខ្លះ ហើយអ្វីដែលគាត់ធ្វើឡើងសូម្បីកាន់តែចម្លែក ព្រោះខណៈពេលនោះមេឃក៏ភ្លៀងទៀតផង ។
យោងតាមប្រភពព័ត៌មាន ខណៈផ្លូវបែងចែកជា២នោះ មានការកកស្ទះកាន់តែខ្លាំងឡើង ជាហេតុធ្វើរថយន្ត១គ្រឿងដែលមានការធុញទ្រាន់ ក៏បានបើកគេចចេញពីបុរសនោះ និងអាហាររបស់គាត់ បណ្តាលឲ្យជួបគ្រោះថ្នាក់ចរាចរណ៍ជាមួយរថយន្តដឹកទំនិញ១គ្រឿងទៀត ។
ទន្ទឹមនេះផងដែរ អ្នកលេងអ៊ីនធើរណែតមួយចំនួន បានកើតការងឿងឆ្ងល់ថា ហេតុអ្វីបានជាបុរសនោះសម្រេចចិត្តយកចង្ក្រានចម្អិនកណ្តាលថ្នល់បែបនេះ ។ ទោះបីមនុស្សមួយចំនួននិយាយថា ពួកគេចង់ភ្លក់រសជាតិគុយទាវរបស់១ចាន តែអ្នកដទៃទៀតបានឆ្លើយតបដោយនិយាយថា៖ «អ្នកប្រហែលចូលចិត្តញ៉ាំធូលី និងផឹកទឹកភ្លៀងបែបនេះមែន!?» ។
ទោះយ៉ាងណា ពួកគេសង្ស័យថា បុរសនេះប្រហែលជាមនុស្សគ្មានផ្ទះសំបែង ហើយប៉ូលីសចរាចរណ៍ក្រោយមក ក៏បានមកដល់ និងនាំគាត់ទៅកាន់ទីកន្លែងសុវត្ថិភាព ។ បច្ចុប្បន្ន គេនៅតែមិនច្បាស់ចំពោះមូលហេតុដែលបុរសនេះសម្រេចចិត្តមកចម្អិនអាហាររបស់គាត់ នៅក្នុងកន្លែងមិនសមរម្យបែបនេះ ។
សំណាងល្អហើយ ដែលពុំមាននរណាម្នាក់រងការប៉ះទង្គិច ប៉ុន្តែ វាអាចនឹងត្រូវបញ្ចប់យ៉ាងធ្ងន់ធ្ងរ ប្រសិនជាអ្នកបើកបរពុំបានគ្រប់គ្រងការបើកបរទាន់ពេលវេលានោះ ៕ ចន្ទី (worldofbuzz)