តាកែវ៖ ថ្លែងប្រាប់ក្រុមអ្នកសារពត័មានក្នុងពេលចុះពិនិត្យសុខភាពភ្នែក និងចែកវេនតាការពារភ្នែក ជូនដល់បងប្អូនប្រជាពលរដ្ឋជាច្រើននាក់នៅឃុំដូង ស្រុកបាទី ខេត្តតាកែវ នាថ្ងៃទី ២៧ ខែសីហា ២០១៨នេះ លោក តែ សេរីបុណ្យ ប្រធានមន្ទីរពេទ្យភ្នែកខេត្តតាកែវ បានថ្លែងថា ដើម្បីចូលរួមចំណែកក្នុងការកាត់បន្ថយនៅអត្រាពិការភ្នែកអោយនៅកំរិតទៀប មន្ទីរពេទ្យភ្នែកខេត្តតាកែវ បានសហការជាមួយនិងក្រុមហ៊ុន OVITZ ដែលជាម្ចាស់ជំនួយ ក្រោមការជួយឧបត្តម្ភផ្ទាល់ពីរាជរដ្ឋាភិបាលកូរ៉េ បានធ្វើការចុះពិនិត្យសុខភាពភ្នែកដល់បងប្អូនប្រជាពលរដ្ឋនៅក្នុងថ្ងៃនេះ ប្រមានជាង ៤០០នាក់ ដែលកំពុងមានបញ្ហាភ្នែក ។ ហើយបន្ទាប់ពីការពិនិត្យជាក់ស្តែងនេះរួចហើយ បងប្អូនប្រជាពលរដ្ឋមួយចំនួន ត្រូវបានធ្វើការព្យាបាលភ្លាមៗ ដោយអោយជាថ្នាំបន្តក់ភ្នែក និងធ្វើការចែកវេនតាជូនដល់ពួកគាត់ ដោយក្រុមគ្រូពេទ្យមកពីខេត្តផងដែរ មិនតែប៉ុណ្ណោះ សម្រាប់អ្នកដែលមានជម្ងឺភ្នែកមានស្ថានភាពធ្ងន់ធ្ងរ និងត្រូវបានដឹកបន្តយកទៅធ្វើការវះកាត់ ឬបកភ្នែក នៅមន្ទីរពេទ្យភ្នែកខេត្ត ដោយមិនមានបង់ថវិការឡើយ ។
លោកប្រធានមន្ទីរពេទ្យភ្នែកខេត្តតាកែវ បានបន្តថា ជាញឹកញាប់ក្នុងរយៈពេល មួយខែ គឺមន្ទីរពេទ្យភ្នែកតែងតែចុះពិនិត្យសុខភាពភ្នែកដល់បងប្អូនប្រជាពលរដ្ឋនៅតាមឃុំមួយចំនួននក្នុងខេត្ត ដោយក្នុងមួយខែគឺធ្វើការចុះពិនិត្យចំនួន ២ដង ហើយក្នុងថ្ងៃនេះគឺជាថ្ងៃពិសេសមួយ ដែលបានក្រុមហ៊ុន OVITZ បានធ្វើការជួយឧបត្តម្ភលើថវិការ ថែមទាំងបានជួយនៅឧបករណ៏សម្រាប់ពិនិត្យភ្នែក ដែលជាផលិតផលរបស់ក្រុមហ៊ុនគាត់ មកអោយក្រុមគ្រូពេទ្យរបស់យើងធ្វើការពិនិត្យ ដើម្បីផ្តល់នៅភាពងាយស្រួលដល់ក្រុមគ្រូពេទ្យទាំងនោះ ក្នុងការវិភាគរករោគវិនិច្ឆ័យ និងបានផ្តល់នៅវេនតាការពារភ្នែកដល់ប្រជាពលរដ្ឋបានទាន់ពេលវេលា នៅពេលចុះពិនិត្យជាក់ស្តែងម្តងៗ ។
លោកប្រធានមន្ទីរពេទ្យភ្នែកបានបន្តថា រាល់សកម្មភាពដែលក្រុមពួកគាត់ធ្វើក្នុងថ្ងៃនេះ គឺជាគោលដៅមួយរបស់អង្គការសុខភាពពិភពលោក ដែលមានទិសដៅក្នុងការចូលរួមកាត់បន្ថយអត្រាពិការភ្នែកអោយបាន ២៥% សម្រាប់ឆ្នាំ ២០១៩នេះ ។
លោក Sungmin lee អ្នកគ្រប់គ្រងទូរទៅក្រុមហ៊ុន OVITZ បានថ្លែងថា ដោយមើលឃើញថាមន្ទីរពេទ្យភ្នែកខេត្តតាកែវ មានសកម្មភាពច្រើន លើការពិនិត្យសុខភាពភ្នែកដល់ប្រជាជននោះ គឺក្រុមហ៊ុនរបស់លោក បានផ្តល់នៅម៉ាស៊ីន ពិនិត្យភ្នែកដែលផលិតដោយក្រុមហ៊ុនរបស់លោកផ្ទាល់ រួមជាមួយនិងវេនតាការពារភ្នែកជាច្រើន សម្រាប់ជួយដល់ដំណើរការជួយសង្គ្រោះប្រជាពលរដ្ឋ ក៏ដូចជាការចូលរួមចំនែកក្នុងការកាត់បន្ថយនៅអត្រាពិការភ្នែកផងដែរ ។
លោក Sungmin lee បានបញ្ញាក់ទៀតថា ឆ្លងកាត់ការចុះពិនិត្យយ៉ាងសកម្ម និងមានប្រជាពលរដ្ឋជាច្រើនដែលមកចូលរួមទទួល នៅការពិនិត្យភ្នែកនេះដែរ ទៅថ្ងៃខាងមុខ ក្រុមហ៊ុនរបស់លោក និងបន្តចុះសហការជាមួយនិងមន្ទីរពេទ្យភ្នែកខេត្ត ដើម្បីចុះពិនិត្យសុខ ភាពភ្នែក ជូនដល់បងប្អូនប្រជាពលរដ្ឋជាច្រើនទៀតដែលកំពុងតែជួបប្រទះនៅបញ្ហាភ្នែកនេះ ៕ តាកែវ