បុរសវ័យក្មេងម្នាក់ ត្រូវបានបាញ់ប្រហារដោយចោរសង្ស័យ២នាក់ បន្ទាប់ពីបានរត់គេចខ្លួនពីវាយប្រហារកាលពីថ្ងៃសៅរ៍ (២៥ សីហា) នៅក្នុង Pontes និង Lacerda ចម្ងាយ ៤៨៣ គីឡូម៉ែត្រពីរដ្ឋធានី Cuiabá ប្រទេសប្រេស៊ីល ។
ប៉ូលីសបានឲ្យដឹងថា បុរសម្នាក់ឈ្មោះ Daniel de Sá Freitas អាយុ ២០ ឆ្នាំ ត្រូវបានបាញ់ប្រហារយ៉ាងសាហាវ នៅក្នុងមន្ទីរពេទ្យ Vale do Guaporé បន្ទាប់ពីគាត់ត្រូវបានដេញតាមដោយបុរស២នាក់ ។ ហេតុការណ៍ដ៏សាហាវនេះ បានកើតឡើងនៅវេលាម៉ោង ៥ ព្រឹក នៅក្នុងផ្នែកកណ្តាលនៃ Pontes និង Lacerda ។
សាក្សីជាច្រើនបាននិយាយថា បុរសវ័យក្មេង២នាក់ មានការភ័យខ្លាចយ៉ាងខ្លាំង និងនិយាយថា ពួកគេទើបតែបានទទួលរងការប៉ុនប៉ងប្លន់ ហើយថា ម្នាក់ក្នុងចំណោមពួកគេត្រូវបានបាញ់ប្រហារ ។
យោងតាមសារព័ត៌មានក្នុងតំបន់ Daniel (ជនរងគ្រោះ) បានកំពុងបើករថយន្ត Celta ពណ៌ខ្មៅ ចេញពីតំបន់មួយ អមដំណើរដោយស្ត្រីម្នាក់ ។ នៅពេលធ្វើដំណើរចូលក្បែរមន្ទីរពេទ្យមួយ Daniel ក៏បានឈប់រថយន្ត ដើម្បីឆ្លើយការហៅទូរស័ព្ទ ។ ប៉ុន្តែ ភ្លាមៗនោះ ជនសង្ស័យ២នាក់ ក៏ស្រាប់តែបានចូលមកកៀករថយន្តរបស់ពួកគេ ហើយម្នាក់ក្នុងចំណោមជនសង្ស័យទាំង២ បានដកកាំភ្លើងភ្ជង់ Daniel តែម្តង ។
ភ្លាមៗនោះ Daniel ក៏បានប្រញាប់ប្រញាល់រត់ចូលក្នុងមន្ទីរពេទ្យ ដើម្បីលាក់ខ្លួន ប៉ុន្តែ គាត់ត្រូវបានដេញតាមបាញ់ប្រហារឲ្យរត់រួចឡើយ ។ ខណៈគាត់បានរត់ដួលទៅនឹងកម្រាលដោយឈឺចុកចាប់របួសត្រូវគ្រាប់ នៅក្នុងមន្ទីរពេទ្យ ជនដៃដល់ក៏បានមកដល់ និងព្យាយាមបាញ់ប្រហារទៅលើខ្នងរបស់ Daniel សរុបចំនួន ៧ គ្រាប់ មុនពេលរត់គេចខ្លួន ។
Daniel ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យប្រចាំតំបន់ Cáceres ។ គ្រូពេទ្យបញ្ជាក់ថា ជនសង្គ្រោះសំណាងហើយ ដែលគ្រាប់កាំភ្លើងទាំងនោះ ពុំប៉ះចំកន្លែងសំខាន់នៃសរីរាង្គខាងក្នុងរបស់គាត់ ៕ ឧត្តម