កំពង់ស្ពឺ ៖ គណៈបញ្ជាការឯកភាពស្រុកភ្នំស្រួច ដឹកនាំដោយ លោក ហន ពិសិដ្ឋ អភិបាល នៃគណៈអភិបាលស្រុកភ្នំស្រួចវេលាម៉ោង ១៤,៣០ នាទី ថ្ងៃទី២៧ ខែសីហា ឆ្នាំ២០១៨ បានដឹកនាំកម្លាំងនគរបាល ចុះបង្ក្រាបទីតាំងបើកភ្នាល់ល្បែងស៊ីសងប្រជល់មាន់មួយកន្លែង នៅចំនុចព្រៃចំការមាត់អូរ ខាងជើងភូមិចំការចេក ចម្ងាយប្រហែល ៣.៥ គីឡូម៉ែត្រ ក្នុងឃុំត្រែងត្រយឹង។
ជាក់ស្ដែងកំលាំងសមត្ថកិច្ចទៅដល់ក្រុមអ្នកញៀនល្បែងបាននាំគ្នារត់ប្រាសចូល ព្រៃ និងចំការបាតជើងសរព្រាត សល់វត្ថុតាង សម្ភារៈរួមមាន ៖
– កៅអីជ័រ សំរាប់អង្គុយ ចំនួន ៨៥
– ជាលក្រុងមាន់ជល់ ចំនួន ១០
– តង់កៅស៊ូប្រក់ដំបូល ចំនួន ១៣
– ចាន និងគំរប បាញ់អាប៉ោង ១ ឈុត
– ជញ្ជីងថ្លឹងមាន់ ចំនួន ១
– គ្រែឈើ ចំនួន ១
– តុដែក ចំនួន ១
ដោយបានការអនុញ្ញាតិពីលោកព្រះរាជអាជ្ញា អយ្យ ការ អមសាលាដំបូងខេត្ដ ក្រុមការងារបានសម្រេច ដុតកំទេចសម្ភារៈចោលនៅនឹងកន្លែងទីតាំងប្រជល់មាន់ខុសច្បាប់ខាងលើ មូលហេតុពិបាកក្នុងការដឹកជញ្ជូន រីឯម៉ូតូចំនួន ១២ គ្រឿង និងរថយន្ត ៧គ្រឿង ដែលជារបស់អ្នកលេងល្បែងជល់មាន់ ត្រូវបានបញ្ជូនទៅរក្សាទុកជាបណ្ដោះអាសន្ន នៅអធិការដ្ឋាននគរបាលស្រុកភ្នំស្រួច រង់ចាំចំណាត់ការបន្ត៕ ដោយ ៖ បញ្ញាស័ក្តិ
