ស្ត្រីអតិថិជនម្នាក់ ត្រូវបានចាក់សោរមិនឲ្យចេញនៅក្នុងហាងធ្វើក្រចកមួយកន្លែង នៅក្នុង British Columbia ប្រទេសកាណាដា បន្ទាប់ពីត្រូវបានចោទប្រកាន់បដិសេធបង់ប្រាក់ សម្រាប់សេវាកម្មចោទថា «មិនពេញចិត្ត» កាលពីដើមខែសីហានេះ ។
Ashley Deshaies អាយុ ២៦ ឆ្នាំ បានទៅកាន់ហាងធ្វើក្រចក HD Nails នៅ Fraser Vallery ដើម្បីខុសខាត់ក្រចក និងព្យាបាលម្រាមជើង កាលពីថ្ងៃទី៤ ខែសីហា ។
នៅក្នុងវីដេអូ Deshaies អាចត្រូវបានឃើញកំពុងតតាំងនឹងបុគ្គលិក ៥ នាក់ ដែលក្នុងនោះរួមទាំងម្ចាស់ហាង ដែលបានរារាំងនាងមិនឲ្យចាកចេញ ។
Deshaies បានស្រែកដាក់បុគ្គលិកប្រុសម្នាក់ដែលបានចាប់ដៃរបស់នាងថា៖ «សូមឲ្យខ្ញុំចាកចេញពីហាងឡប់ៗរបស់អ្នកទៅ ។ កុំមកប៉ះខ្ញុំ!!» ។
ខណៈពេលបន្ទាប់មក Deshaies បានងាកទៅរកស្ត្រីដែលផ្តល់សេវាសំអាតក្រចក និងព្យាបាលជើងឲ្យនាង ដោយនិយាយថា៖ «នៅពេលខ្ញុំស្នើអ្នកឲ្យធ្វើក្រចកខ្ញុំល្អប្រសើរឡើងវិញ អ្នកមិនធ្វើវាទេ ។ ក្រចកជើងទាំងអស់របស់ខ្ញុំមានប្រវែងខុសៗគ្នា អ្នកសូម្បីមិនបានបង្ហើយម្រាមជើងរបស់ខ្ញុំ ។ វាមើលទៅគួរឲ្យរន្ធត់ណាស់» ។
បុគ្គលិកនោះបានតបតដោយនិយាយថា ក្រចករបស់នាងមើលទៅ «ស្រស់ស្អាត» រួចហើយ និងបានទាមទារឲ្យនាងត្រូវបង់ថ្លៃសេវាកម្មចំនួន ៧៦ ដុល្លារកាណាដា (៥៨.៣៨ ដុល្លារ) ។
ទោះយ៉ាងណា Deshaies បានយល់ព្រមបង់ត្រឹមតែពាក់កណ្តាលប៉ុណ្ណោះ ដរាបណាក្រចកជើងរបស់នាង ត្រូវបានធ្វើឲ្យល្អប្រសើរឡើងវិញ ។
ខណៈនាងនៅតែនិយាយដដែលៗថា៖ «ពួកវាទាំងអស់ គឺមានប្រវែងខុសៗគ្នា!», បុគ្គលិកម្នាក់ក៏បានស្រែកតបវិញថា៖ «នាងមិនត្រូវនិយាយយ៉ាងដូច្នេះទេ នាងជាមនុស្សកុហក!» ។
កន្លែងកើតហេតុកាន់តែផ្ទុះឡើង នៅពេលដែលឪពុករបស់ Deshaies ឈ្មោះ Bernard Besier បានមកដល់រួមជាមួយមិត្តភក្តិគាត់ម្នាក់ និងចាប់ផ្តើមថតវីដេអូហេតុការណ៍នេះពីខាងក្រៅ ។
Besier អាចត្រូវបានលឺនិយាយក្នុងវីដេអូថា៖ «ខ្ញុំនឹងវាយបំបែកបង្អួចនេះ» ។
មួយសន្ទុះក្រោយមក ប៉ូលីសក៏បានមកដល់កន្លែងកើតហេតុ និងបានបង្គាប់ឲ្យ Deshaies ដោះស្រាយថ្លៃសេវារបស់នាង ២៣ ដុល្លារ ឬ អាចត្រូវចាប់ខ្លួនពីបទក្លែងបន្លំ ។ នាងបានចាកចេញពីហាងធ្វើក្រចកនេះ ជាមួយស្នាមជាំ និងកោសលើស្បែក ។
ស្ត្រីម្នាស់ហាងឈ្មោះ Anna Dang បាននិយាយថា៖ «ខ្ញុំត្រូវការថ្លៃឈ្នួល ព្រោះខ្ញុំមិនចង់ផ្តល់នូវសេវាកម្មរបស់ខ្ញុំដោយហ្វ្រ៊ីៗនោះទេ ។ ហើយពុំត្រឹមតែប៉ុណ្ណឹងទេ អតិថិជននេះក៏បានវាយមុខរបស់ខ្ញុំទៀតផង» ៕ ចន្ទី (nextshark)