Ryuji Imai ជាក្មេងប្រុសជនជាតិជប៉ុន អាយុ ៨ ឆ្នាំ ដែលត្រូវបានផ្តល់រហ្សនាមថា «Bruce Lee ឬ លី សៀវឡុង ចាប់ជាតិ» ថ្មីៗនេះ បានជួបជាមួយតារាក្បាច់គុនដ៏ល្បីល្បាញ១ដួង ក្នុងចំណោម idol កំពូលៗរបស់គេ គឺលោក Donnie Yen ហៅថា «កុំកុំ» ។
Imai បានទទួលភាពល្បីល្បាញលើកដំបូង នៅពេលរូបគេមានអាយុទើបតែបាន ៥ ឆ្នាំ បន្ទាប់ពីវីដេអូមួយបានបង្ហាញរូបគេ បញ្ចេញតិចនិកក្បាច់គុន «ត្រាប់តាម» អតីតស្តេចក្បាច់គុនកុងហ្វ៊ូ Burce Lee (លី សៀវឡុង) បានរីករាលយ៉ាងខ្លាំងនៅលើអ៊ីនធើរណេត ។
នៅលើគណនីហ្វេសប៊ុករបស់ Imai បានបញ្ចេញឲ្យឃើញថា រូបគេបានកំពុងហ្វឹកហាត់យ៉ាងខ្លាំងក្លាបំផុត ដើម្បីធ្វើតាម «ស្ទៃល៍» របស់លោក លី ចាប់តាំងពីពេលនោះមក ។ ក្មេងប្រុសមានដុងដ៏កំពូលនេះ ក៏បានកំពុងរៀនតិចនិកឲ្យល្អប្រសើររបស់ Jeet Kune Do ជាមួយនឹងការណែនាំរបស់ឪពុករបស់គេ ។
ប្រព័ន្ធផ្សព្វផ្សាយសង្គមរបស់ Imai ឥឡូវនេះ បាននាំឲ្យរូបគេលេចមុខក្នុងនាមជាភ្ញៀវកិត្តិយសនៅលើទូរទស្សន៍អន្តរជាតិ និងគម្រោងដទៃៗ ដូចជាការអញ្ជើញចូលរួមក្នុងព្រឹត្តិការណ៍ធំៗជាច្រើនទៀតផងដែរ ។
ជាក់ស្តែង «នាគតូច» ដ៏គួរឲ្យស្រលាញ់រូបនេះ បានចូលរួមក្នុងព្រឹត្តិការណ៍រម្លឹកអនុស្សាវរីយ៍របស់ Bruce Lee (លី សៀវឡុង) នៅក្នុងទីក្រុងតូក្យូ កាលពីថ្ងៃទី០១ សីហា ។
Imai ត្រូវបានគេរាយការណ៍ឲ្យដឹងថា បានសម្តែងការរីករាយខ្លាំងណាស់ ដែលបានជួបផ្ទាល់ជាមួយតារាក្បាច់គុនអន្តរជាតិល្បីៗ ជាពិសេសលោក Donnie Yen (កុំកុំ) ។
ក្នុងអំឡុងពេលនៃការជួបគ្នាដ៏ខ្លី Imai បានឆ្លៀតបញ្ចេញក្បាច់គុនក្នុងលក្ខណៈបែប «សាហាវ» លេងសើចដាក់ ខណៈថតជាមួយកំពូលតារាក្បាច់ហុងកុងនេះ ។ ក្រៅពីនេះ Imai ក៏បានសម្តែងពីចេតនារបស់គេ ចូលរួមជាមួយលោក Yen នៅក្នុងរឿង «IP Man» នៅក្នុងថ្ងៃអនាគតផងដែរ ។
លោក Yen (កុំកុំ) បានសរសេរនៅលើហ្វេសប៊ុករបស់គាត់ថា៖ «បានចូលរួមជាភ្ញៀវពិសេស នៅក្នុងព្រឹត្តិការណ៍អនុស្សាវរីយ៍របស់លោក Bruce Lee នៅក្នុងទីក្រុងតូក្យូ កាលពីពីរបីថ្ងៃមុននេះ ខ្ញុំត្រូវបានធ្វើអោយរំភើបចិត្តយ៉ាងខ្លាំង ដោយក្រុមអ្នកគាំទ្រជប៉ុន និងជាពិសេសបានជួបជាមួយ «លី សៀវឡុងតូច» ម្នាក់ដែលកំពុងល្បីល្បាញនៅលើពិភពលោកគឺ Ryuji ដែលបានប្រាប់ខ្ញុំថា គាត់បានទស្សនាគ្រប់រឿង Ipman និងបង្ហាញដល់ខ្ញុំនូវការសម្តែងក្នងរឿង Ipman របស់ខ្ញុំទៀតផង» ។
ក្រៅពីជួបជាមួយលោក Yen ក្មេងប្រុសដ៏មានទេពកោសល្យត្រាប់តាម លី សៀវឡុង រូបនេះ ក៏បានជួបជាមួយវីរតារាសម្តែងហុងកុង Yuen Biao ផងដែរ ៕ ឧត្តម (nextshark)