ភ្នំពេញ៖ ប្រជាពលរដ្ឋរស់នៅតាមប្រឡាយស្ទឹងមានជ័យ១៥៣គ្រួសារបានចាកចេញពីលំនៅដ្ឋានរបស់ពួកគាត់តាមមាត់ប្រឡាយ មកស្នាក់ក្រោមស្ពានអាកាសស្ទឹងមានជ័យក្រោមការរៀបចំកន្លែងស្នាក់នៅជាបណ្ណោះអាសន្នរបស់រដ្ឋបាលរាជធានីភ្នំពេញ ដើម្បីអភិវឌ្ឍន៍ប្រឡាយនេះឡើង ហើយប្រជាពលរដ្ឋទាំងនេះក៏នឹងទទួលបានប័ណ្ណកម្មសិទ្ធិដីស្របច្បាប់នៅហ្នឹងកន្លែងផងដែរ។
ដើម្បីអោយការរៀបចំនេះបានល្អប្រសើរ លោកឃួង ស្រេង អភិបាលរាជធានីភ្នំពេញ អភិបាលរងនិងមន្ត្រីជំនាញនៅល្ងាចថ្ងៃទី២៣វិច្ឆិកានេះបានចុះមើលស្ថានភាពជាក់ស្តែនៃការការរៀបចំកន្លែងស្នាក់នៅជាបណ្ណោះអាសន្ននេះផងដែរ។ លោកឃួង ស្រេង អភិបាលនៃគណៈអភិបាលរាជធានីភ្នំពេញ បានប្រាប់ប្រជាពលរដ្ឋថា ប្រជាពលរដ្ឋរស់នៅតាមប្រឡាយស្ទឹងមានជ័យជាង១៥៣គ្រួសារនឹងត្រូវបញ្ជូនមកស្នាក់នៅ ផ្ទះទំហំ៤គុណ៦ម៉ែត្រ មានផ្លូវមុខ ក្រោយមានទឹកភ្លើងនិងបង្គន់អនាម័យ ជាបណ្ណោះអាសន្ននៅក្រោមស្ពានអាកាសស្ទឹងមានជ័យ។
លោកបន្យថា ជាជំហានទី១ យ៉ាងយូរយៈ ពេល១ខែទៀត អាជ្ញាធររាជធានីភ្នំពេញនឹងផ្តល់បណ្ណ័កម្មសិទ្ធស្របច្បាប់ជូនដល់បងប្អូនប្រជាពលរដ្ឋនៅសហគមស្ទឹងមានជ័យនេះតែម្តង។ ជាគម្រោងនៅពេលដែលការស្ថាបនាប្រឡាយនិងផ្លូវអមសងខាងប្រឡាយនេះ ស្ថានាបានរួចរាល់ រដ្ឋបាលរាជធានីភ្នំពេញ នឹងរៀបចំតបណ្តាញទឹកស្អាត ភ្លើងអគ្គីសនីចូលផ្ទះប្រជាពលរដ្ឋ រួមនឹងការដាក់បង្កោលភ្លើងសាធារណៈនៅលើផ្លូវនេះថែមទៀត ដើម្បីអោយតំបន់នេះក្លាយជាទីក្រុងស្ទឹងមានជ័យ ។
តំណាងប្រជាពលរដ្ឋរស់នៅលើប្រឡាយស្ទឹងមានជ័យ៨សហគមន បានលើកឡើងថា ពួកគាត់រស់នៅលើប្រឡាយនេះច្រើនឆ្នាំមកហើយ ដោយ រស់នៅលើសម្រាមពិបាក ទឹកស្អុយពិបាកក្នុងការរស់នៅណាស់ ហើយនៅពេលទទួលបានការជួយពីរដ្ឋបាលរាជធានីភ្នំពេញ ពួកគាត់ពិតជារីករាយ ពិសេសការទទួលបានកាដូរយ៉ាងធំពីរដ្ឋបាលរាជធានីភ្នំពេញ នោះគឺ អោយប្រជាពលរដ្ឋអភិវឌ្ឍន៍នៅហ្នឹងកន្លែងនិងផ្តល់កម្មសិទ្ធដីធ្លីស្របច្បាប់ជូនពួកគាត់ទៀត។
លោកស្រី លុច វ៉ាន់ អាយុ៦៧ឆ្នាំ ថាគាត់បាន រស់នៅតាំងលើប្រឡាយនេះតាំងពីឆ្នាំ១៩៩៣ ពីមុនគាត់មិនសូវទុកចិត្តទេ ខ្លាចគេបោកយកទៅរស់នៅឆ្ងាយពីក្រុង តែពេលនេះគាត់ជឿទុកចិត្តហើយ ដោយអាជ្ញាធររាជធានីអោយអភិវឌ្ឍន៍នៅហ្នឹងកន្លែងនិងផ្តល់កម្មសិទ្ធស្របច្បាប់ទៀត ហើយភាពជាក់ស្តែងគឺបានបង្ហាញអោយឃើញនៅពេលនេះស្រាប់ ។លោកស្រីបានថ្លែងការដឹងគុណយ៉ាងជ្រាលជ្រៅណាស់ចំពោះអាជ្ញាធររាជធានីភ្នំពេញ ដែលបានគិតគូនិងយកចិត្តទុកដាក់ចំពោះប្រជាពលរដ្ឋក្រីក្រដូចពួកគាត់នេះ។
មន្ត្រីរដ្ឋបាលរាជធានីភ្នំពេញបានអោយដឹងថា ប្រឡាយស្ទឹងមានជ័យដែលរដ្ឋបាលរាជធានីភ្នំពេញគ្រោងនឹងធ្វើការអភិវឌ្ឍនេះមានប្រវែង១៣៥០ម៉ែត្រ ដោយឆ្លងកាត់ខណ្ឌចំនួន២ នោះគឺខណ្ឌមានជ័យនិងខណ្ឌសែន សុខ ដែលមានប្រជាពលរដ្ឋរស់នៅនិងរងផលប៉ះពាល់ប្រឡាយនេះចំនួន៥៦២គ្រួសារ ហើយប្រជាពលរដ្ឋទាំងអស់នេះនឹងទទួលបានដីទំហំ៤គុណនិង៦ម៉ែត្រជាកម្មសិទ្ធិស្របច្បាប់នៅហ្នឹងកន្លែងតែម្តង។
ប្រឡាយស្ទឹងមានជ័យនឹងត្រូវសាងសង់ឡើង ដោយបុកស៊ីផាយដូចនៅប្រឡាយបាក់ទូកដែរ ដោយត្រូវធ្វើផ្លូវ៦ម៉ែត្រជាប្រភេទផ្លូវបេតុង រៀបចំតបណ្តាញទឹក ភ្លើងអគ្គីសនីចូលផ្ទះប្រជាពលរដ្ឋ ដាក់បង្កោលភ្លើងសាធារណៈនៅលើផ្លូវនេះថែមទៀត ។ ប្រឡាយស្ទឹងមានជ័យនេះបានដើរតួយ៉ាងសំខាន់ ក្នុងការនាំទឹកទំលាក់ចូលទៅបឹងទំពុន។ ជាគម្រោងតួប្រឡាយស្ទឹងមានជ័យមានទំហំ៨ម៉ែត្រ ចិញ្វើម២ ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១ម៉ែត្រកន្លះនិងក្រោយផ្ទះកន្លះម៉ែត្រ៕ ដោយ៖កូឡាប
