តាម RT នៅថ្ងៃទី ២៧ ខែសីហា បានចុះផ្សាយព័ត៌មានថា ចោរ១ក្រុមបានឆ្មក់ចូលឃ្លាំងអាវុធមួយរបស់ប៉ូលិសប៉ារ៉ាហ្គាយ នារដ្ឋធានី Capiata រួចយកយ៉ាងតិចកាំភ្លើងវែង ៤២ដើម ធុន FN FAL ដោយយកកាំភ្លើងក្លែងក្លាយ ធ្វើពីជ័រ ឬឈើមកធ្វើជាថ្នូរ ។
រឿងរ៉ាវទើបបែកធ្លាយកាលពីសប្តាហ៍មុន គ្រាដែលគេពិនិត្យឃើញកាំភ្លើងប្រភេទនេះ មានលក់លើទីផ្សារងងឹត ។ ក្រោយការត្រួតពិនិត្យមើលឃ្លាំងអាវុធឡើងវិញទើបភ្ញាក់ខ្លួនព្រើត ពុំដឹងថា កាំភ្លើងក្លែងក្លាយទាំងនោះមក “ជំនួស” កន្លែងកាំភ្លើងពីអង្កាល់ !
រូបកាំភ្លើងក្លែងក្លាយដែលពួកចោរយកមកដាក់ជំនួសកាំភ្លើងក្លែងក្លាយទាំងនេះ ធ្វើបាន “យ៉ាងល្អ” ប្រសិនបើក្រឡេកមើលមួយភ្លែតប្រាកដជាពុំអាចដឹងឡើយ ហើយបើអ្នកគ្មានបទពិសោធន៍ទេប្រាកដជាជឿថាវាជាកាំភ្លើងពិត ។
មកទល់ពេលនេះ មានតែនាយប៉ូលិសម្នាក់ត្រូវផ្អាកការងារបម្រើឲ្យការស៊ើបអង្កេតប៉ុណ្ណោះ រីឯក្រុមចោរសម័យ ៣D ខាងលើពុំទាន់រកឃើញតម្រុយទេ ។
ការត្រួតពិនិត្យខាងលើនៅបានរកឃើញថា មានកាំភ្លើងខ្លីដល់ទៅ ៩០ដើម បានបាត់ពីឃ្លាំងនៅទូទាំងប្រទេស ៕ ចន្ទ្រា