នេះជារឿងដ៏គួរឲ្យភ្ញាក់ផ្អើលមួយ ខណៈពេលដែលស្ត្រីម្នាក់ បានចូលទៅក្នុងវត្តទាំងយប់អាធ្រាតតែម្នាក់ឯង និងឡើងទៅកាន់បន្ទប់កុដិលោកក្នុងឥរិយាបថយ៉ាងប្រញាប់ប្រញាល់ដ៏ចម្លែក ។ ទាក់ទិននឹងករណីនេះផងដែរ នៅថ្ងៃទី០៨ សីហា ព្រះសង្ឃមួយអង្គបានផុសសារមួយនៅលើគណនីហ្វេសប៊ុករបស់លោកឈ្មោះថា “Teerawit Suko” ដើម្បីជាការព្រមានដល់ព្រះសង្ឃទាំងអស់ ឲ្យមានការប្រុងយ័ត្ន ជាមួយជនចម្លែកដែលចូលក្នុងវត្តបែបនេះ ដើម្បីចៀសវាងពីការបាត់បង់ទ្រព្យសម្បត្តិ ឬ ក៏អាចក្លាយជាជនរងគ្រោះត្រូវបានចោទប្រកាន់ក្នុងអំពើមិនល្អផ្សេងៗពីសង្គម ។
ក្នុងសារព្រមានរបស់ព្រះសង្ឃ Teerawit Suko បានឲ្យដឹងថា នៅវេលាម៉ោងប្រហែល ៧ យប់ថ្ងៃទី០៧ សីហា ស្ត្រីមិនស្គាល់អត្តសញ្ញាណម្នាក់ បានចូលទៅក្នុងវត្ត Rachathiwat ស្ថិតនៅភាគខាងត្បូងប្រទេសថៃ ខណៈព្រះសង្ឃភាគច្រើននៅតែមិនទាន់ចូលសឹងនៅឡើយ ។ ប៉ុន្តែ ឥរិយាបថដ៏ចម្លែករបស់ស្ត្រីរូបនោះ ពុំត្រូវបានព្រះសង្ឃអង្គណាស្វាគមន៍ និងបើកទ្វារបន្ទប់ឲ្យចូលនោះទេ ស្ថិតនៅកុដិជាន់ទី២ ។
តាមរយៈវីដេអូកាមេរ៉ាឃ្លាំមើល ស្ត្រីម្នាក់ស្ថិតក្នុងសម្លៀកបំពាក់អាវយឺតពណ៌ខ្មៅ និងស្លៀកខោជើងវែងពណ៌ប្រផេះយ៉ាងសមសួន បានឡើងទៅកាន់បន្ទប់លោកជាន់ទី២ និងដំបូងឡើយ បានអើតមើលក្នុងបន្ទប់ រួចរុញគោះទ្វារហាក់ដូចមានការអ្វីសំខាន់បន្ទាន់អីចឹង ។
បន្ទាប់ពុំការទទួលការស្វាគមន៍អ្វីទាំងអស់ មួយសន្ទុះក្រោយមក ស្ត្រីរូបនោះក៏បានចុះទៅកាន់ជាន់ទី១វិញ និងបន្តគោះទ្វារបន្ទប់លោកមួយផ្សេងទៀត ។ ប៉ុន្តែ ដោយសារនៅតែពុំមានការឆ្លើយតបនឹងសកម្មភាពរបស់នាងដដែល ទីបំផុត នាងក៏បានចុះទៅជាន់ផ្ទាល់ដីវិញ រួចដើរចាកចេញទៅខាងក្រៅ ។
ព្រះសង្ឃអង្គនេះនៅមានសង្ឃដីការក្នុងសារថា សំណាងហើយ ដែលអាត្មានៅថ្ងៃនោះ ជាប់រវល់ និងវិលត្រឡប់មកវត្តវិញយឺតយ៉ាវ ដោយសារជាប់ស្ទះចរាចរណ៍ ហើយបានត្រឹមរកឃើញភស្តុតាងតាមរយៈវីដេអូកាមេរ៉ា និងការពន្យល់ប្រាប់ហេតុការណ៍នេះពីសិស្សៗគុណដែលថា ស្ត្រីនោះបានអះអាងថា នាងមានសាច់ញាតិស្លាប់នៅឯស្រុកកំណើត និងពុំមានលុយធ្វើដំណើរទៅទេ ហេតុនេះ នាងស្នើសុំលុយមួយចំនួន ប៉ុន្តែ ពួកគេពុំហ៊ានបើក ។
នេះចាត់ទុកជារឿងដ៏ល្អហើយ ដែលមានកាមេរ៉ាធ្វើជាភស្តុតាង ពុំនោះសោត នឹងអាចមានសង្ឃណាមួយនោះទទួលរងការចោទប្រកាន់ ក្នុងផ្លូវមិនល្អណាមួយពុំខានឡើយ ៕ ចន្ទី (naewna.com)
ចុះប្រិយមិត្ត CEN វិញ យល់ឃើញទង្វើរបស់ស្ត្រីរូបនេះក្នុងផ្លូវយ៉ាងណាដែរ ?